«Металлург» — «Бухоро» ўйинини кўриб чиққан Европадаги таҳлил компанияси Олий лиганинг яна бир ўйини бўйича ўзининг хулосасини тақдим этди. Дунёнинг турли букмекерлик идоралари билан ҳамкорлик қилувчи мазкур компания таҳлилига кўра, Олий лиганинг 19-тури доирасида Зоминда ўтказилган «Сўғдиёна» — «Навбаҳор» ўйини келишилган бўлиб чиқди, деб хабар бермоқда Stadion.uz.
Компания хулосаси:
«Ўзбекистон Олий лигаси.
‘Сўғдиёна’ (Жиззах) — ‘Навбаҳор’ (Наманган)
Натижа: 5:4 (биринчи бўлим: 3:2)
Мазкур ўйин давомида Осиёдаги букмекерлик идоралари томонидан жонли ставкалар қабул қилиш жараёнида жуда шубҳали ставкалар қабул қилинган. Масалан, ўйиннинг 69-дақиқаси ўтиб бораётганида (3:3), 188bet букмекерлик идораси ‘Навбаҳор’га 0,25 та гол устунлик бериб, ‘Сўғдиёна’нинг ғалабаси учун 1,11 коэффициент берган.
(Гап шундаки, Осиёдаги букмекерлик идораларида Asian Handicap деб номланган тизим амалда бўлиб, унда дуранг учун ставка қабул қилинмайди, фақат ғалаба учун тикиш лозим. Агар ўйин дуранг билан якунланган тақдирда ҳам ‘Навбаҳор’ ғалаба қозонган ҳисобланади — 3:3,25)
Таклиф қилинган 1,11 коэффициент эса минимал бўлиб, одатда бундай ҳолатларда таклиф қилинадиган ставкалардан анча кам (одатда 1,72). Шунга қарамай, барча пул тикувчилар ишонч билан ‘Сўғдиёна’нинг ғалабасига ставкалар тиккан. Бундай ҳолат ҳалол ва қонуний ўтган ўйинларда аввал кузатилмаган эди.
Бундан ташқари, ўйинда камида тўққизта гол урилишига тикилган ставкалар ҳам катта шубҳа уйғотди. Ушбу баҳс Осиёнинг барча букмекерлик идораларида катта шубҳа туғдиргани боис, ўйин барча идоралар рўйхатидан дарҳол олиб ташланди. Бу ҳолат эса букмекерлик компаниялари ушбу ўйинга шубҳа билан қараганидан далолат беради ва улар мазкур ўйин учун масъулиятни ўз зиммаларига олишни истамади. Энг катта шубҳа уйғотган ҳолат ўз тасдиғини топди — 91-дақиқада Илҳом Комилов ‘Сўғдиёна’нинг ғалаба тўпини киритди.
Шунингдек, ‘Навбаҳор’нинг ушбу мавсумдаги яна иккита ўйини жиддий шубҳа остига олинган. Таҳлил компанияси ишонч билан айта оладики, ‘Навбаҳор’ мазкур ўйиндан молиявий фойда топиш мақсадида ‘Сўғдиёна’га ютқазиб берган».
Ҳозирда ЎФФ «Металлург» — «Бухоро» (4:3) ўйинини ўрганмоқда.
Умид қиламиз, ЎФФ «Сўғдиёна» — «Навбаҳор» (5:4) ўйинини ҳам жиддий ўрганиб чиқади, деб қайд этди Stadion.uz.
Изоҳ (0)