HP компанияси аллақачон бир қанча Android планшетларини тақдим этган бўлса-да, бу билан чекланиб қолмоқчи эмас. Компания бу сафар Slate 7 VoiceTab Ultra ва Slate 8 Plus планшетларини тақдим этди. Бу ҳақда Mail.Ru хабар берди.
Қизиғи шундаки, HP паншетлари яқинда Huawei тақдим этган MediaPad X1 ва MediaPad M1 планшетларининг «эгизаклари»га ўхшайди. Ўхшашлик фақат дизайнда эмас, қурилмаларнинг барча хусусиятлари ҳам Huawei планшетлариники билан бир хил.
HP Slate 7 VoiceTab Ultra планшети алюмин корпус, 7 дюймли LTPS дисплей, 1,6 ГГц частотага эга HiSilicon Kirin 910 тўрт ядроли чипи, 2 Гб тезкор ва MicroSD ёрдамида 32 гигабайтгача ошириш мумкин бўлган 16 Гб ички хотирага эга. Унда 5 мегапикселли олд ва 13 мегапикселли орқа камералар мавжуд. Унинг ўлчамлари 183,5 × 103,9 × 7,18 миллиметр, оғирлиги 239 грамм, нархи эса 400 долларни ташкил этади.
HP Slate 8 Plus планшети Huawei MediaPad M1 планшетининг худди ўзи бўлиб, унда 8 дюймли IPS дисплей, 1,6 ГГц частотага эга тўрт ядроли чип, 1 мегапикселли олд ва 5 мегапикселли орқа камера ўрнатилган. Аккумулятор қуввати 4800 мА·соат ва у 8 соат видео кўришга етади. Гаджетнинг Европада сотилиш нархи 299 еврони ташкил қилади.
Бундай ҳол биринчи марта эмас: HP компаниясининг Slate 7 Extreme планшети ҳам NVIDIA Tegra Note 7 билан ўхшаш бўлган, дейилади хабарда.
Изоҳ (0)