Россиянинг етакчи учта ахборот агентлигидан бири — «Интерфакс» футбол янгиликларини тарқатишга ихтисослашган Uff.uz сайтини Ўзбекистон футбол федерацияси (ЎФФ)нинг веб-саҳифаси сифатида таништирди, дея хабар беради «Кун».
Агентлик 17 июнь куни Лондоннинг «Челси» жамоаси собиқ бош мураббийи Авраам Грант билан Uff.uz сайтида эълон қилинган хабарга асосланиб ахборот берар экан, ўз сайтида ушбу ахборот Ўзбекистон футбол федерацияси томонидан тарқатилганини маълум қилган. Ҳақиқатда эса, ЎФФнинг сайти the-uff.com манзилида жойлашган ва у ерда Авраам Грант ҳақида ҳеч қандай ахборот берилмаган.
2006 йилда ташкил этилган Uff.uz сайти WWW.uz миллий рейтинги маълумотларига кўра, Узнетда энг кўп фойдаланувчи кирадиган ресурс ҳисобланади. Сайт ўзбекчадан ташқари, рус ва инглиз тилларида ҳам фаолият олиб боради. Сайтдаги логотип остига «Ўзбекистонда футбол янгиликлари» деб ёзилган ва ҳеч бир саҳифасида Ўзбекистон футбол федерациясига алоқадорлигини билдирувчи белги йўқ.
Ўзбекистон футбол федерациясининг илк расмий сайти 2005 йили uzfootball.com манзилида ишга туширилган бўлиб, ресурс 2007 йилда the-uff.com манзилига кўчирилган. ЎФФ матбуот хизмати ўз сайтини ўзбек ва рус тилларида олиб боради. Бундан ташқари, ташкилот Twitter, Facebook ва Instagram ижтимоий тармоқларида ҳам ўз каналларига эга.
1989 йилда ташкил этилган «Интерфакс» «РИА Новости» ва «ИТАР-ТАСС» билан биргаликда Россиянинг етакчи мустақил ахборот агентликларидан бири ҳисобланади. Агентлик «Интерфакс-Украина», «Интерфакс-Ғарб» (Беларусь), «Интерфакс-Қозоғистон», «Интерфакс-Озарбайжон» каби миллий тармоқларига ҳам эга. Ўзбекистон Республикаси Ташқи ишлар вазирлиги ҳузурида «Интерфакс»нинг икки мухбири аккредитациядан ўтган.
Изоҳ (0)