Apple xodimi kompaniyaga qarshi da’vo qo‘zg‘atdi. U kompaniyani xodimlarning shaxsiy qurilmalariga o‘rnatishni talab qilayotgan dasturiy ta’minot orqali kuzatuvni amalga oshirganlikda aybladi.
Apple’ning reklama texnologiyalari bo‘limidan Amar Bxaktning aytishicha, kompaniya xodimlardan shaxsiy qurilmalariga maxsus dasturiy ta’minotni o‘rnatishni talab qilmoqda. Bu dastur kompaniyaga xodimlarning elektron pochtasi, fotosuratlar arxivi, sog‘liq haqidagi ma’lumotlari va boshqa shaxsiy ma’lumotlariga kirish imkonini beradi.
“Agar siz shaxsiy hisobingizni iPhone, iPad yoki Apple tomonidan boshqariladigan yoxud Apple’ga tegishli kompyuterda ishlatsangiz, qurilmada saqlangan barcha ma’lumotlar (jumladan, elektron xatlar, fotosuratlar, videolar, qaydlar va boshqa ma’lumotlar) Apple tomonidan tekshirilishi mumkin”, deyiladi da’voda.
Bundan tashqari, da’vogar Apple xodimlarga mehnat sharoitlarini muhokama qilishni, ommaviy axborot vositalari bilan aloqa o‘rnatishni va Apple ichidagi qonunbuzarliklar haqidagi ma’lumotlarni oshkor etishni taqiqlayotganini qayd etgan. 2020-yildan beri kompaniyada ishlab kelayotgan Bxakt, unga podkastlarda o‘z ishi haqida so‘zlashni man etishgani va LinkedIn’dagi profilidan mehnat sharoitlari to‘g‘risidagi ma’lumotlarni o‘chirishga majbur qilishganini aytgan.
Apple esa bu ayblovlarga javob berib, da’volar asossiz ekanligini va xodimlar har yili mehnat sharoitlarini muhokama qilish bo‘yicha o‘qitishdan o‘tishini ma’lum qildi.
Izoh (0)