Vyetnamdagi to‘fonda 5 kishi halok bo‘lib, 2 kishi bedarak yo‘qoldi
Vyetnamning markaziy qismini qamrab olgan to‘fon shamollari va yomg‘irlar oqibatida 5 kishi halok bo‘lgan va yana 2 kishi bedarak yo‘qolgan. Bu haqda Arab News xabar berdi.
Tabiiy ofat oqibatida 70 ming gektardan ortiq ekin maydonlarini suv bosgani aytilmoqda. “Vutip” to‘foni 14-iyun kuni Xitoyning janubiga soatiga 128 kilometr tezlikda shamol esishi bilan yetib kelgan va Tonkin ko‘rfazining Vyetnam qanotiga yopirilishidan keyin tropik bo‘ronga aylangan.
Vyetnam Qishloq xo‘jaligi vazirligi 14-iyun kuni kechqurun markaziy Quang Tri provinsiyasida 5 kishi halok bo‘lgani va 2 kishi bedarak yo‘qolganini ma’lum qilgan.
Xitoyning janubiy Xaynan orolidagi rasmiylar juma kuni bo‘ron kirib kelishidan oldin minglab odamlarni evakuatsiya qilgan, maktablar yopilgan va temiryo‘l qatnovi to‘xtatilgan. Birlashgan tayfun ogohlantirish markazi bo‘ron dam olish kunlari oxiriga kelib susayishini e’lon qilgan.
Tabiiy ofatlar 2024-yili Vyetnamda 514 kishining hayotiga zomin bo‘lgandi. Bu 2023-yilga nisbatan 3 baravar ko‘p, deya xabar beradi Qishloq xo‘jaligi vazirligi. Sentyabr oyida Vyetnam shimolida 345 kishining o‘limiga sabab bo‘lgan “Yagi” to‘foni taxminan 3,3 milliard dollar iqtisodiy zarar olib kelgandi.
