Toni Kroos “Real” rahbariyatiga futbolchi tavsiya qildi
Germaniyaning “Shtutgart” klubi yarim himoyachisi Anxelo Shtiller Ispaniya grandi — “Real” “radariga tushdi”. Bu haqda Todofichajes nashri xabar bermoqda.
Manbaga ko‘ra, 24 yoshli futbolchi nomzodini “Real”ning sobiq afsonasi Toni Kroos tavsiya qilgan. Klub rahbariyati Kroosning fikrini inobatga olib, Shtiller transferini ko‘rib chiqmoqda. Madridliklar hozir futbolchining agenti bilan muzokara boshlagan, agar kelishuvga erishilsa, bitim imzolanishi mumkin.
Anxelo tayanch yarim himoyacha pozitsiyasida to‘p tepadi. Klub bu orqali joriy mavsum muammo kuzatilgan pozitsiyadagi kamchilikni yo‘qotmoqchi. 2001-yilda tug‘ilgan futbolchi 2024-yilning sentyabr oyidan beri Germaniya terma jamoasi a’zosi hisoblanadi.
Shtiller joriy mavsum Germaniya Bundesligasi doirasidagi 32 ta uchrashuvda maydonga tushib, o‘z hisobiga 1 gol hamda 8 ta golli uzatma yozdirib qo‘ygan. Uning “Shtutgart” bilan shartnomasi 2028-yilning yoziga qadar amal qiladi. Transfermarkt portali Anxeloning qiymatini 38 million yevroga baholagan.
