Munosib qarshilik, o‘yinda burilish va “pley-off” bosqichiga yo‘l: “Navbahor” va “FarDU” o‘yinidan fotogalereya
O‘zbekiston Kubogining guruh bosqichi, 3-turidan o‘rin olgan bahsni “Navbahor” jamoasi o‘z maydonida yaqin o‘tmishning taniqli o‘yinchilari – Sergey Lebedev hamda Abdusamad Do‘rmonov murabbiylik qilayotgan “FarDU” (Farg‘ona)ga qarshi o‘tkazdi.
“Lochinlar” ilk daqiqalardan boshlab farg‘onaliklar darvozasi oldida xavfli vaziyatlarni yaratishga intildi. Mehmonlar esa bahsning birinchi bo‘limida munosib qarshilik ko‘rsatdi. Natijada jamoalar tanaffusga durang – 0:0 hisobida yo‘l oldi.
“Navbahor ustozi Sergey Lushan o‘yinga o‘zgartirish maqsadida uchrashuvning 2-bo‘limida tarkibda bir qator o‘zgarishlarni amalga oshirdi. Bu esa o‘z samarasini berib, aynan zaxiradan maydonga tushgan futbolchilar o‘yinda burilish yasay oldi.
Bellashuvning 65-daqiqasida Alisher Odilovning chap qanotdan jarima maydonchasi ichiga yetkazib bergan to‘pini Zabihillo O‘rinboyev darvozaga aniq yo‘llab, hisobni ochdi – 1:0.
Ushbu goldan ruhlangan Sergey Lushan shogirdlari hujumni kuchaytirdi. Mezbonlarning navbatdagi hujumlaridan birida Ruslanbek Jiyanov 18 metrlar chamasi uzoqlikdan kuchli zarba yo‘llab, darvozani aniq nishonga olgan hisobdagi farqni oshirdi – 2:0.
Oradan 5 daqiqa o‘tar-o‘tmas, Ruslanbek Jiyanovning o‘ng qanotdan oshirgan to‘pini Alisher Odilov darvozaga aniq yo‘llab, hisobning yirik ko‘rinish olishini taʼminladi – 3:0.
Uchrashuvning asosiy vaqtiga hakam tomonidan qo‘shib berilgan daqiqalar davom etayotgan paytda “FarDU” yarim himoyachisi Sherzod Qodirov gol urib, hisobdagi farqni qisqartirdi – 3:1.
Shu tariqa, “E” guruhida 7 tadan ochko to‘plagan “Neftchi” va “Navbahor” jamoalari “pley-off” bosqichiga yo‘l oldi.
“Daryo” “Navbahor” va “FarDU” jamoalari o‘rtasidagi o‘yindan fotogalereya tayyorladi.
