Sovet kosmik kemasi “Kosmos-482” Hind okeaniga qulab tushdi
1972-yilda uchirilgan “Kosmos-482” kosmik apparati orbitadan chiqib, Hind okeaniga quladi. Bu haqda “Roskosmos” xabar berdi.
“Qurilmaning okeanga qulashi Yerga yaqin fazodagi xavfli vaziyatlardan ogohlantirishning avtomatlashtirilgan tizimi tomonidan boshqarilgan”, deyiladi xabarda.
Foto: Freepick
Mutaxassislarning hisob-kitoblariga ko‘ra, qurilma Toshkent vaqti bilan soat 11:24 da O‘rta Andaman orolidan 560 km g‘arbda atmosferaning zich qatlamlariga kirib, Jakarta g‘arbidagi Hind okeaniga qulagan.
Koinot kemasi 1972-yil bahorida Venerani o‘rganish uchun uchirilgan, biroq kuchaytiruvchi blokdagi nosozlik tufayli u Yerning yuqori elliptik orbitasida qolib, asta-sekin sayyoraga yaqinlashgan.
Avvalroq “O‘zkosmos” mutaxassisi internetda qurilma Markaziy Osiyo hududiga tushishi mumkinligi haqidagi xabarlarga izoh bergan edi. Uning xabar berishicha, uning O‘zbekiston hududiga tushishi ehtimoli 0,3-0,5 foizni tashkil etgan.
