Toshkent shahrida avtomobilida 5 kilo giyohvandlik moddasi olib ketayotgan haydovchi qo‘lga olindi. Bu haqda 18-iyul kuni Ichki ishlar vazirligi xabar berdi.
Voqea Yunusobod tumanida ro‘y bergan. IIV va DXX xodimlari Spark’ni to‘xtatib, avtomobil old qismini ko‘zdan kechirgan. Mashinadan polietilen paketlarga o‘ralgan 5 kilo giyohvandlik vositalari topilgan.
Surishtiruv davomida gumonlanuvchining sherigi borligi aniqlangan va uning uyi ham tekshirilgan. Xonadondan olti o‘ramda bir necha turdagi narkotik moddalar topilgan.
“O‘tkazilgan tezkor tadbirda jami 5 kilo 370 gramm giyohvandlik moddalari tarqalishining oldi olindi”, deyiladi xabarda.
Holat yuzasidan Jinoyat kodeksining 273-moddasi 5-qismi bilan jinoyat ishi qo‘zg‘atilgan, gumonlanuvchilar qamoqqa olingan.
“Mashinadan chiqqan narkotik moddasi meniki. Qilgan ishimdan mingdan-ming pushaymonman, afsusdaman. Hammasiga endi aqlim yetdi. Juda yomon holatda qolib ketdik. Uydagilarim ham men qilgan ish uchun mahalladosh, qarindosh-urug‘lar oldida sharmanda bo‘lishdi”, deydi Spark haydovchisi.
Avvalroq Surxondaryo viloyati Denov tumanida Cobalt avtomobilidan 9,1 kilo gashish narkotik moddasi topilgani xabar qilingandi. Modda mashinada yo‘lovchi sifatida ketayotgan fuqaroga tegishli bo‘lgan.
Izoh (0)