O‘zbekiston terma jamoasi yarim himoyachisi Hojimat Erkinov Toshkentning “Paxtakor” klubi bilan shartnoma imzoladi. Klub matbuot xizmatining xabar berishicha, futbolchi “sherlar” bilan 1,5 yillik bitimga imzo chekkan.
Erkinov — “Paxtakor” futbol akademiyasining tarbiyalanuvchisi hisoblanadi. 2022-yilda Toshkent klubi uni Rossiyaning “Torpedo Moskva” jamoasiga transfer qilgan edi. Biroq, Moskvada u doimiy o‘yin amaliyotiga ega bo‘la olmadi va 2023-yilda ijara asosida “sherlar” safiga qaytdi.
2024-yilning yozida Erkinov “Torpedo”ni tark etib, Birlashgan Arab Amirliklarining “Al-Vahda” klubiga o‘tdi. Ushbu transfer uchun amirliklar jamoasi “Torpedo”ga 300 ming yevro to‘lagan.
Futbolchining “Al-Vahda” bilan tuzgan shartnomasi joriy yilning iyul oyi boshida yakuniga yetdi. U erkin agent maqomida “sherlar” safiga qaytdi.
Ma’lumot uchun, Hojimat Erkinov “Paxtakor” tarkibida shu kungacha 75 ta uchrashuvda maydonga tushib, 17 ta gol urgan. Transfermarkt portali futbolchining qiymatini 1,5 million yevroga baholamoqda.
Izoh (0)