Tramp “Epshteyn ishi” bo‘yicha barcha maxfiy materiallarni oshkor qilishni buyurdi

AQSH prezidenti Donald Tramp payshanba kuni kechqurun bosh prokuror Pam Bondiga Jeffri Epshteyn ishi bo‘yicha hakamlar hay’ati tomonidan yig‘ilgan barcha maxfiy materiallarni oshkor qilishni topshirganini e’lon qildi. Bu haqda CBS News xaber berdi.

Tramp bu qadamni “demokratlarning yana bir yolg‘oniga barham berish uchun kerak”, deya izohladi.

“Jeffri Epshteyn atrofida sun’iy tarzda yaratilgan g‘ayrioddiy darajadagi shov-shuvlar tufayli, men bosh prokuror Pam Bondidan sud roziligi asosida mavjud bo‘lgan barcha tegishli katta hay’at guvohliklarini oshkor etishni so‘radim. Demokratlar tomonidan uyushtirilgan bu firibgarlik darhol tugatilishi kerak!”, deb yozgan Tramp o‘zining Truth Social platformasida.

Bundan bir necha daqiqa o‘tib, Amerika bosh prokurori Pam Bondi o‘zining X ijtimoiy tarmog‘ida shunday deb yozdi: “Biz ertaga katta hay’at eshituvi stenogrammalarini oshkor etish uchun sudga murojaat qilishga tayyormiz”. 

CBS News nashrining yozishicha, materiallar oshkor qilinishi yoki qilinmasligi bo‘yicha yakuniy qarorni sudya qabul qiladi. Bu jarayon biroz vaqt olishi mumkin va darhol amalga oshishi kutilmayapti. 

Avvalroq Trampning tarafdorlari Oq uyni “Epshteyn ishi” bo‘yicha barcha ma’lumotlarni oshkor qilmaganlikda ayblab, norozilik bildirgan edi.

Eslatib o‘tamiz, Jeffri Epshteyn badavlat shaxslar uchum voyaga yetmagan qizlar ishtirokida kechalar tashkil qilishda ayblangan edi.