Kecha tunda Ukraina dronlari Rossiyaning bir qancha shaharlariga hujum uyushtirdi. Hujum natijasida Sheremetyevo va Domodedovo aeroportlari vaqtincha samolyotlarni qabul qilish va jo‘natishni to‘xtatdi. Aloqa tarmog‘iga zarar yetkazilgani tufayli 50 dan ortiq poyezd qatnovlari kechiktirilgan.
Rossiya Mudofaa vazirligi ma’lumotiga ko‘ra, havo mudofaa kuchlari 71 ta dronni urib tushirgan. Ulardan 13 tasi Moskvaga yaqinlashayotganida yo‘q qilingan. Shu sababli Sheremetyevo va Domodedovo aeroportlari vaqtincha samolyotlarni qabul qilish va jo‘natishni to‘xtatgan.
Moskva viloyatining Dmitrov tumanida dron qulaganidan so‘ng elektr uzatish liniyasi zarar ko‘rgan. Mahalliy hokimiyatlarga ko‘ra, bu hodisada hech kim jabrlanmagan.
Rostov viloyatida esa Kamensk-Shakhtinskiy shahriga uyushtirilgan dron hujumi natijasida bir nechta uylar yonib ketgan, bir kishi jarohat olgan. Bu haqda viloyat rahbari vazifasini bajaruvchi Yuriy Slyusar ma’lum qildi. Hududdagi Kamenskiy tumanida elektr transformatori yonib ketgan, natijada qariyb 2000 kishi elektr ta’minotisiz qolgan.
Bundan tashqari, Rostov viloyatida qulagan dron parchalari temiryo‘l kontakt liniyasini shikastlagan. Natijada uzoq masofali 50 dan ortiq poyezdning harakati kechiktirilgan. Shuningdek, bir qator shahar atrofidagi elektr poyezdlar qatnovi bekor qilindi, deb xabar berdi Rossiya temir yo‘llari.
Izoh (0)