Xitoyning Xiaomi kompaniyasi yangi loyiha — Xiaomi Youth Apartment’ni taqdim etdi. Bu arzon narxdagi xonadonlar kompaniyada ishlashni xohlovchi talabalar uchun mo‘ljallangan. Loyihaning asosiy maqsadi yosh bitiruvchilarni qo‘llab-quvvatlash va ularga Xiaomi ofislariga yaqin joyda qulay turar joy taqdim etishdir.
Hozircha Xiaomi ikkita turar joy majmuasi qurdi. Ulardan biri Pekinda joylashgan bo‘lib, 7 ta binodan va 2658 ta 29 metr kvadrat maydondagi studiyalardan iborat. Har bir xonadonda alohida hammom mavjud, mebellar to‘liq ta’minlangan.
Yotoqxonalar Xiaomi’ning ilg‘or texnologiyalari: “aqlli” choynak, yorug‘lik moslamalari, ovozli yordamchilar va hatto avtomatik parda tizimigacha jihozlangan. Shuningdek, binoning birinchi qavatida sport zal, kovorking maydoni, kichik restoran va bog‘ga chiqish eshigi bo‘lgan umumiy hudud tashkil etilgan.
29-iyundan boshlab Xiaomi 2025-yil bitiruvchilari uchun Pekin kompleksiga joylashish uchun arizalarni qabul qila boshladi. Yoz davomida tanlov 2022–2024-yil bitiruvchilari uchun ham ochiladi. Ijaraning oylik qiymati 1999 yuan (taxminan 280 dollar). Bunday kvartirada yashash uchun bitiruvchi keyinchalik Xiaomi’da ishlashi kerak.
Majmua Xiaomi’ning bosh texnologik parkidan 10 kilometr va Xiaomi Smart sanoat hududidan 3 km uzoqlikda joylashgan. Kompaniya xodimlarga doimiy avtobuslar, 24 soatlik navbatchi yordam xizmati va ko‘chish paytida yuk tashish kabi qulayliklarni va’da qilgan.
Ikkinchi turar joy majmuasi esa Nankin shahrida joylashgan bo‘lib, 55 metr kvadrat maydonga ega 566 ta ikki xonali kvartiralardan iborat. Bu bino Xiaomi Nanjing Tech Park kampusidan atigi 100 metr uzoqlikda. Pekindagidan farqli o‘laroq, bu yerdagi xonadonlar barcha amaldagi Xiaomi xodimlariga taqdim etiladi.
Xiaomi asoschisi Ley Tszyunning aytishicha, bu uylar kompaniya muhandislarining turmush sifatini yaxshilash uchun qurilgan.
Izoh (0)