Bu haqda mamlakat ichki ishlar vaziri Entoni Berk ma’lum qildi. Ichki ishlar vazirining so‘zlariga ko‘ra, reperning vizasini bekor qilish to‘g‘risidagi qaror Apple Music, Spotify va YouTube’da taqiqlangan Heil Hitler trekidan keyin qabul qilingan.
"Menimcha, nafratni import qilish oqilona emas," - deya tushuntirdi ichki ishlar vaziri. Berk idorasi vakillarining qo‘shimcha qilishicha, vizani bekor qilish mamlakat fuqarolarini "jinoiy faoliyat yoki bezovta qiluvchi xatti-harakatlar bilan shug‘ullanishga qaror qilgan odamlar tomonidan zarar yetkazish xavfidan" himoya qilish chorasidir.
Uestning rafiqasi Bianca Senzori Melburnda tug‘ilib o‘sgan. Berkning so‘zlariga ko‘ra, er-xotin Senzorilar oilasini ko‘rish uchun Avstraliyaga tez-tez borib turishgan.
Reper 2025-yil 8-mayda — Yevropa va AQSHda Ikkinchi jahon urushi tugaganini nishonlash kuni – antisemitizm (bu yahudiylarga nisbatan noto‘g‘ri tushuncha yoki nafratdir) qo‘shig‘ini tarmoqqa joyladi. Qo‘shiqda natsistlar salomi ko‘p marta takrorlangan.
Bungacha reper antisemit fikrlari tufayli bir necha bor janjallarga sabab bo‘lgan. Shu sababli u, xususan, ijtimoiy tarmoqlarga kirish imkoniyatini, shuningdek, Balenciaga va Adidas bilan shartnomalarni yo‘qotdi.
Izoh (0)