Mashhurligi va mahoratiga qaramay, ayrim aktyorlar salbiy obrazni ishonarli tarzda gavdalantira olmaydi. Tomoshabinlar ularni bunday rolda qabul qilmaydi, buning sabablari turlicha bo‘lishi mumkin — tashqi ko‘rinishning obrazga to‘g‘ri kelmasligi, doimiy ijobiy rollarda ko‘rinib kelgani yoki rolga chuqur kirishdagi muammolar. Quyida ana shunday holatga duch kelgan to‘rt aktyor haqida so‘z yuritamiz.
Jared Leto — “Xudkushlar guruhi” filmidagi Joker
Agar kino ixlosmandlari ilgari Hit Ledjer va Xoakin Feniksning Joker obrazlarini ko‘rmaganida edi, Jared Letoning ijrosi bunchalik salbiy qabul qilinmasdi. Dastlab u bu rolga tasdiqlanganda muxlislar katta umid qilgan edi. Ko‘pchilik Letoning Jokeri juda yorqin chiqishini taxmin qildi, ammo natija kutilganidek bo‘lmadi.
Tanqidchilarning fikricha, har bir aktyor Jokerga o‘ziga xoslikni olib kirgan va uni ko‘p qirrali qilgan. Lekin Jared buni uddalay olmadi. Bundan tashqari, aktyor suratga olish maydonchasida ham salbiy taassurot qoldirdi. Ommaviy axborot vositalari uning kadr ortidagi qiliqlari — goh Leto o‘yin-kulgi uyushtirishi, goh hamkasblarini mazax qilishi haqida yozishdi. Ular Jared o‘z ishiga hurmatsizlik va mas’uliyatsizlik bilan qaraydi, deb hisoblashdi. Bundan tashqari, u bu qiyofada dahshatli ko‘rinishning uddasidan chiqolmadi.
Tomoshabinlar uni “aqldan ozgan Joker” sifatida qabul qila olmadi. Hit Ledjer va Xoakin Feniks esa aksincha, bunday obrazda chuqur psixologik dramatizm yaratgan edi.
Svetlana Xodchenkova — “O‘lmas Rosomaxa” filmidagi Suvilon
Svetlana Xodchenkova Gollivudga ilk qadamlarini qo‘yayotgan paytda “O‘lmas Rosomaxa” filmida Suvilon obrazini ijro etgan. Unga filmda ko‘p vaqt ajratilmagan bo‘lsa-da, bu qisqa daqiqalarda aktrisa obrazi yodda qolarli chiqqan.
Ammo uning obrazi filmda xavfli dushman emas, balki jozibali ayoldek ko‘rinadi. Tomoshabin Rosomaxaga jiddiy tahdid sezmaydi. Xodchenkovaning chiroyli turmagi, moviy ko‘zlari va nafis qiyofasi uni qahri qattiq, qonxo‘r dushman sifatida ko‘rishga xalaqit beradi. Bungacha aktrisa hech qachon salbiy obrazlarni ijro etmagan, bu esa tomoshabinlar unga ishonishiga yanada to‘sqinlik qilgan bo‘lishi mumkin.
Tom Xiddlston — Marvel filmlaridagi Loki
Marvel filmlarida Tom Xiddlston ijrosidagi Loki obrazi shu qadar mashhur bo‘ldiki, u hatto Kapitan Amerikadan ham ko‘proq muxlis to‘pladi. Bu esa odatda yovuz qahramonlarga xos holat emas. Komikslarda Loki makkor, o‘z manfaati uchun har qanday ishga tayyor xoin sifatida tasvirlanadi.
Xiddlston Loki rolida ilk bor 2011-yilda “Tor” filmida paydo bo‘lgan. Unda Loki oilasini sotadi, Yotunxaymni yo‘q qilishga va Yerga hukmronlik qilishga harakat qiladi. Lekin shunga qaramay, tomoshabinlar unga achinish va hamdardlik bilan qaraydi.
Tom Xiddlston ilgari bunday salbiy rollarda o‘ynamagan va har safar Loki xiyonat qilganida ham tomoshabinlar uni tushunishga harakat qilgan. Muxlislarining iliq munosabati sabab Loki asta-sekin ijobiy qahramonga aylana boshladi. Marvel esa syujetni o‘zgartirishga majbur bo‘ldi. Natijada Loki alohida serialda bosh qahramon sifatida chiqdi.
Adam Drayver — “Yulduzlar jangi”
“Yulduzlar jangi: kuch uyg‘onishi” filmida Adam Drayver Kaylo Ren rolini ijro etdi. Tanqidchilar uning aktyorlik mahoratidan mamnun bo‘lsa-da, tomoshabinlar uni muvaffaqiyatsiz deb baholadi. Bu safar ham ularning noroziligi jiddiy asosga ega emasdi. Ko‘pchilikka Adamning tashqi ko‘rinishi va xatti-harakatlari yoqmadi. Tomoshabinlarning fikricha, Drayver aktyordan shafqatsizlik va o‘ziga xos taassurot talab qiladigan yovuz inson roliga hali “yetib bormagan edi”. Kimgadir u yetarlicha kelishgan emas, kimgadir esa haddan ortiq yoqimtoy yigit bo‘lib ko‘rindi.
Izoh (0)