Rossiya hukumati “do‘st bo‘lmagan mamlakatlarda” ishlab chiqilgan messenjerlardan foydalanishni cheklamoqchi. Prezident Vladimir Putin hukumatga tegishli topshiriqni yukladi. Hujjat Kreml rasmiy saytida e’lon qilindi.
Rossiya hukumati Rossiyaga “do‘st bo‘lmagan” xorijiy davlatlarda ishlab chiqarilgan dasturiy ta’minotdan (shu jumladan, aloqa xizmatlaridan) foydalanishga qo‘shimcha cheklovlar joriy etish bo‘yicha takliflar kiritsin, deyiladi topshiriqda.
Bosh vazir Mixail Mishustin ijro uchun mas’ul etib tayinlangan, u 1-sentyabrgacha hisobot taqdim etishi kerak. Iyun oyi oxirida Putin milliy messenjer yaratish to‘g‘risidagi qonunni imzolagandi. Undan oldin Davlat dumasi milliy raqamli platformani yaratish to‘g‘risidagi qonun loyihasini ikkinchi va uchinchi o‘qishda qabul qilgan.
Yangi tizimning asosi Rossiyaning MAX messenjeri bo‘ladi. U amaldagi davlat raqamli platformalari bilan integratsiya qilinadi. Masalan, “Davlat xizmatlari” portalidan ma’lumotlarni uzatish, shaxsni, yoshni yoki ijtimoiy imtiyozlarga bo‘lgan huquqni tasdiqlash imkonini beradi. Biroq bunday tizimning joriy etilishi huquq himoyachilarini xavotirga solmoqda.
“Internetni himoya qilish jamiyati” rahbari Mixail Klimaryev bunday loyihani “fuqarolarni kuzatish vositasi” deb atagan. Uning so‘zlariga ko‘ra, yangi platformaning maxfiylik siyosatida foydalanuvchilarning barcha ma’lumotlari so‘rov bo‘yicha davlat organlariga berishi aniq ko‘rsatilgan.
Federal xavfsizik xizmati, Ichki ishlar vazirligi, Markaziy bank, Soliq qo‘mitasi va hatto “Rosalkoregulyatsiya” ma’lumotlarga kirish huquqiga ega bo‘ladi, degan edi Klimarev.
Davlat dumasida esa mashhur xorijiy platformalarga nisbatan choralarni kuchaytirish ilgari surilgandi. Dumaning axborot siyosati bo‘yicha qo‘mitasi raisi Sergey Boyarskiy mahalliy tizim ishga tushirilgach, Telegram va WhatsApp “Rossiya qonunchiligini buzganlik” uchun qattiqroq sanksiyalarga tushishini istisno etmagan. “Na svyazi” loyihasi Rossiyada Telegram va WhatsApp’ga kirishni cheklash bo‘yicha sinov o‘tkazilgani haqida xabar bergandi.
Avvalroq Rossiyaga “do‘st bo‘lmagan” davlatlar taomiga soliq solish taklif qilingandi. Birinchi navbatda italyan, fransuz, janubiy koreya, yapon, ispan va nemis oshxonalarini “obro‘sizlantirish” kerakligi ilgari surilgan. Ozarbayjon va turk taomlari tayyorlanadigan kafelarni soliqqa tortishni ham muhokama qilish kerakligi aytilgandi.
Izoh (0)