Londonning “Chelsi” klubi futbol tarixida misli ko‘rilmagan yutuqqa erishdi. Stata Football nashrining yozishicha, “aristokratlar” barcha yirik klublararo musobaqalarda g‘oliblikni qo‘lga kiritgan ilk jamoaga aylandi.
Avvalroq londonliklar Angliya Premer Ligasi, Angliya Kubogi, Liga Kubogi, UEFA Chempionlar Ligasi, Yevropa Ligasi va Konferensiyalar Ligasida zafar quchgan edi. Endi esa ushbu ro‘yxatga Klublar o‘rtasidagi Jahon chempionligi ham qo‘shildi.
Ma’lumot uchun, “Chelsi” 2021-yilda ham mundialda g‘alaba qozongan, biroq 2025-yilgi turnir ilk bor yangicha formatda – 32 ta klub ishtirokida o‘tkazildi. London klubi shu tariqa yangi formatdagi Jahon chempionatining ilk g‘olibiga aylandi.
Ma’lumot uchun, mazkur bahs 13-iyuldan 14-iyulga o‘tar kechasi AQShdagi “MetLife” stadionida bo‘lib o‘tdi. Unda “Chelsi” “PSJ”ni 3:0 hisobida mag‘lub etib, bosh sovringa ega chiqdi.
Uchrashuvda hisob 22-daqiqada Koul Palmer tomonidan ochildi. 30-daqiqada Palmer yana bir marta raqib darvozasiga yo‘l topib, o‘zining dublini nishonladi. Tanaffusga yaqin – 43-daqiqada esa Joao Pedro Palmerning ajoyib pasidan keyin uchinchi golni urdi hamda o‘yin taqdirini hal qildi.
Izoh (0)