Vengriyaning Rossiyaga moyilligi bilan tanilgan bosh vaziri Viktor Orban yana Yevropa Ittifoqiga tahdid qildi. U 2028–2034-yillar uchun Ukrainaga 100 milliard yevro ajratishni nazarda tutuvchi YI byudjetini qo‘llab-quvvatlamasligini aytdi.
Orbanning so‘zlariga ko‘ra, mazkur loyiha Vengriya mablag‘larini Ukrainaning foydasiga ishlatadi va vengriyalik fermerlarni og‘ir ahvolga soladi. Bundan tashqari, u yangi byudjet Budapesht uchun “bosim vositasi”ga aylanishini ta’kidladi.
“Biz, vengriyaliklar, urush, immigratsiya va gender tengligi bo‘yicha Bryussel siyosatiga bo‘ysunsakkina o‘zimizga tegishli mablag‘ni olamiz. Buni hech qachon qabul qilmayman”, dedi Orban.
Shuningdek, u Bryusselga murojaat qilib, byudjet loyihasiga qarshi ovoz berishini ta’kidladi. Ammo bu safar Orbanning pozitsiyasi Yevropa Ittifoqi qarorini to‘xtata olmaydi. Sababi, YI byudjeti malakali ko‘pchilik ovoz bilan qabul qilinadi. Shunday ekan, Vengriya bosh vazirining qarori natijaga ta’sir ko‘rsatmaydi.
YI byudjeti loyihasi
Yevropa komissiyasi 16-iyul kuni 2028–2034-yillar uchun byudjet loyihasini e’lon qildi. Uning umumiy hajmi 1,98 trillion yevro, bu amaldagi yetti yillik uchun ajratilgan 1,2 trilliondan ancha yuqori. Ushbu mablag‘ning 100 milliard yevrosi Ukraina uchun ajratiladi.
Byudjet loyihasi Vengriyada keskin norozilikka sabab bo‘ldi. Avval Orbanning o‘zi norozilik bildirdi, keyin esa Vengriya Tashqi ishlar vazirligi ham ittifoqni tanqid qildi.
Izoh (0)