O‘zbekistonda gepatitni aniqlash maqsadida 1,6 million nafarga yaqin kishi skriningdan o‘tkazildi. Bu haqda Sog‘liqni saqlash vazirligi matbuot xizmati xabar berdi.
Prezidentning 2022-yil 16-maydagi tegishli qarori asosida mamlakat bo‘ylab virusli gepatit “B” va “C” turlarini barvaqt aniqlash maqsadida 2023-yildan boshlab salkam 2 million kishini skriningdan o‘tkazish reja qilingan edi. 2025-yilning olti oyi yakuni bo‘yicha bu reja har ikkala yo‘nalishda 80,5 foizga bajarildi va bir million 600 ming nafarga yaqin kishi skriningdan o‘tkazildi.
“Ayni paytda tekshiruvlar jarayonida gepatit aniqlangan bemorlarni sog‘lomlashtirish choralarini ko‘ryapmiz”, degan Virusologiya ilmiy-tadqiqot instituti direktori Erkin Musaboyev.
Uning qayd etishicha, hozirgi vaqtda biobank tashkil etish choralari ko‘rilmoqda. Biobankda quyidagi vazifalar amalga oshiriladi:
- yuqumli kasalliklar sabablari va mexanizmlari o‘rganiladi;
- yuqumli kasalliklarning tarqalish darajasi va xavf omillari tahlil qilinadi;
- tashxisotning yangi usullari ishlab chiqiladi;
- virusli infeksiyalar va bemorlarning genetik ma’lumotlari asosida yangi davolash usullari yaratiladi;
- yangi dori vositalari sinovdan o‘tkaziladi va ularning samaradorligi baholab boriladi.
Xalqaro hamkorlikni yanada mustahkamlash maqsadida 10 dan ziyod davlatning tibbiyot muassasalari bilan memorandumlar imzolangan va ular doirasida katta ishlar ro‘yobga chiqarilmoqda.
Virusli gepatitning “B” va “C” turlariga qarshi skrining
O‘zbekistonda har yili aholi virusli gepatitning “B” va “C” turlariga qarshi skriningdan o‘tkaziladi. Ushbu xavfli kasallikni o‘z vaqtida profilaktika va diagnostika qilish, ularni davolash maqsadida prezidentning 2022-yil 16-mayda tegishli qarori qabul qilingan. Mazkur qarorda virusli gepatitlarning “B” va “C” turlarini erta aniqlash uchun respublikaning barcha hududlarida skrining tekshiruvlarini o‘tkazish va kasallikni davolash qamrovini oshirish borasida bir qator muhim vazifalar belgilangan. Shundan kelib chiqqan holda O‘zbekistondagi 65 dan ortiq oilaviy va ko‘p tarmoqli markaziy poliklinikalarda ushbu kasallikni aniqlash uchun bepul skrining tashkil etildi.
Misr bilan o‘tkazilgan muzokaralar natijasida gepatitga qarshi “Daklatasvir” va “Sofosbuvir” dori vositalarini beg‘araz yordam sifatida yuborish uchun kelishuvga erishilgan. 22-iyunda Misr hukumati tomonidan O‘zbekistonga insonparvarlik yordami sifatida ajratilgan ushbu dori vositasining 2025-yildagi to‘rtinchi partiyasi Toshkentga yetkazilgandi. 1-iyun kuni dori vositalarining 2025-yildagi ilk partiyasi olib kelingandi. 9-iyunda ikkinchi partiyasi, 15-iyunda uchinchi partiyasi keltirildi. Misr hukumati tomonidan taqdim etilgan ushbu dorilar davlat byudjeti mablag‘larini tejashga yordam beradi.
Izoh (0)