AQSHning Los Anjeles xalqaro aeroportidan havoga ko‘tarilgan Boeing 767-400 samolyotining dvigateli yonib ketdi. Bu haqda ABC7 xabar berdi.
Samolyotda to‘qqiz nafar ekipaj a’zosi va 226 nafar yo‘lovchi bo‘lgan. Ular Atlantaga yo‘l olgan, biroq parvoz vaqti uchoqning chap dvigatelida muammo yuzaga kelgan. Natijada uchuvchi samolyotni ortga qaytarishga majbur bo‘lgan.
Delta aviakompaniyasining 446-reysi xavfsiz qo‘ndi. Yo‘lovchilar samolyotni odatdagi tartibda tark etdi. Hozirda yuzaga kelgan muammo sababini aniqlash maqsadida tekshiruv o‘tkazilmoqda, deyiladi Delta aviakompaniyasi xabarida.
Yo‘lovchilar rejalashtirilgan yakuniy manzilga boshqa samolyotda yetkazilgan.
AQSHda bahor oylarida yo‘lovchi samolyoti parvozni to‘xtatishga majbur bo‘lgandi. United Airlines aviakompaniyasiga tegishli samolyot dvigateli osmonda yonib ketgan. Hodisa dvigatelga quyon kirib ketganidan keyin yuz bergan. Bunga qadar Texas shtatidagi Jorj Bush nomidagi aeroportda United Airlines’ning Airbus A319 samolyoti uchishga uringan paytda yonib ketgandi.
Shuningdek, AQSHdagi aeroportda samolyot dvigatelida muammo yuzaga kelgach, 200 dan ortiq yo‘lovchi qor bosgan uchish-qo‘nish yo‘lagiga zudlik bilan evakuatsiya qilingandi.
2024-yil bahorida esa United Airlines’ga qarashli boshqa bir samolyotning dvigateli Chikago aeroportida yongan. Samolyot yo‘lovchilari evakuatsiya qilinib, reys kechiktirilgan.
Izoh (0)