Transafg‘on temiryo‘li loyihasi bo‘yicha texnik-iqtisodiy asosni ishlab chiqish yuzasidan uch tomonlama bitim imzolandi. Bu haqda O‘zbekiston TIV rahbari Baxtiyor Saidov ma’lum qildi.
Uning qayd etishicha, hujjat 17-iyul kuni Kobul shahrida O‘zbekiston, Afg‘oniston va Pokiston tashqi ishlar vazirlari transafg‘on masalasidagi ilk uch tomonlama uchrashuvi davomida imzolangan.
“O‘zbekiston, Afg‘oniston va Pokiston tashqi ishlar vazirlarining birinchi uch tomonlama uchrashuvi o‘zaro ishonch, yaxshi qo‘shnichilik va mintaqaviy hamkorlikni chuqurlashtirish yo‘lidagi tarixiy qadam bo‘ldi”, deb yozdi Baxtiyor Saidov.
Vazirning bildirishicha, O‘zbekiston—Afg‘oniston—Pokiston transafg‘on temiryo‘li butun Yevrosiyo uchun strategik ahamiyatga ega bo‘lib, mazkur loyiha savdoni kuchaytiradi, Afg‘onistonning iqtisodiy tiklanishini qo‘llab-quvvatlaydi va janubiy portlar orqali jahon bozorlariga yangi yo‘l ochadi.
Tomonlar, shuningdek, qishloq xo‘jaligi, farmatsevtika, to‘qimachilik va qurilish kabi sohalarda hamkorlikni, Termiz xalqaro savdo markazi imkoniyatlaridan faol foydalanishni kengaytirishga kelishib oldi.
“O‘zbekiston temir yo‘llari” matbuot xizmatining bildirishicha, mazkur loyihaning global miqyosdagi geosiyosiy ahamiyatini, shuningdek, transafg‘on transport yo‘lagini shakllantirishdagi O‘zbekiston tomonidan bildirilgan tashabbuskorlikni inobatga olgan holda, ushbu bitimning imzolanish marosimi Kobul shahrida o‘tkazildi.
Hujjatning imzolanishi, avvalo, loyihaning tezroq amalga oshirilishiga, Yevrosiyoning yagona transport markazini yaratishga hamda davlatlar o‘rtasidagi ko‘p tomonlama hamkorlikning yanada chuqurlashishiga xizmat qiladi.
Izoh (0)