O‘zbekistonda xususiy tibbiy klinikalarga organ ko‘chirib o‘tkazish bo‘yicha operatsiyalarni o‘tkazishga ruxsat berilishi mumkin. Spot xabar qilishicha, bu haqda 15-iyul kuni Savdo-sanoat palatasida tashkillashtirilgan sog‘liqni saqlash sohasi vakillari bilan ochiq muloqotda ma’lum qilindi.
Qashqadaryo viloyati sog‘liqni saqlash boshqarmasi boshlig‘i Alisher Boboyevning ma’lum qilishicha, prezident qarori loyihasi ishlab chiqilgan bo‘lib, u boshqa vazirlik va hokimliklar bilan kelishilmoqda. Hujjatda xususiy klinikalarga organ ko‘chirib o‘tkazish operatsiyalarini amalga oshirishga ruxsat berilishi nazarda tutilgan. Prezident qarori yaqin 2−3 hafta ichida e’lon qilinishi mumkin.
“Juda ko‘p bemorlar boshqa davlatlarga bormoqda. 10 nafar bemordan faqat beshtasida buning uchun mablag‘ bo‘lishi mumkin, qolganlari esa mamlakatda qolishga majbur. Agar bu sohani rivojlantirmasak va mahalliy kadrlarni tayyorlamasak, biz ancha orqada qolamiz”, degan Central Asian Medical University rektori Nurillo Mamasodiqov.
Sog‘liqni saqlash vazirligining Litsenziyalash, akkreditatsiyalash va tibbiy turizmni rivojlantirish boshqarmasi boshlig‘i Jaloliddin Asamutdinov so‘nggi yillarda xususiy sektorga transplantologiyaga kirish imkonini berish masalasi juda dolzarb bo‘lib borayotganini qayd etdi.
“Bemorlarning O‘zbekistondan xorijga oqimi sezilarli o‘sdi. Biz aslida Hindiston, Turkiya va boshqa davlatlardan, ayniqsa, transplantologiya sohasida tibbiy xizmatlarni import qilyapmiz. Bu esa bir qator tashkiliy, huquqiy va moliyaviy muammolarni keltirib chiqarmoqda. Xususiy sektor bunday operatsiyalarni O‘zbekistonda o‘tkazishga ruxsat berishni taklif qilmoqda. Biroq buning uchun qonunchilikni o‘zgartirish kerak bo‘ladi — bu esa tez amalga oshadigan jarayon emas. Shunga qaramay, bu yo‘nalishda ishlar boshlangan”, degan vazirlik vakili.
Uning ta’kidlashicha, transplantologiya og‘ir va murakkab masala bo‘lib, u O‘zbekiston hududida tegishli infratuzilmani yaratishni talab etadi. Xususan, genetik tadqiqotlar va boshqa testlarni o‘tkazish imkoniyati zarur bo‘ladi.
Jaloliddin Asamutdinovning aytishicha, Sog‘liqni saqlash vazirligi xususiy sektorga transplantologiyaga bosqichma-bosqich ruxsat berish masalasini diqqat bilan o‘rganmoqda. Dastlabki bosqichda unchalik murakkab bo‘lmagan operatsiyalarni amalga oshirishga ruxsat berish, kelgusida esa bunday imkoniyatni barcha malakali klinikalarga berish rejalashtirilgan.
Ayni paytda O‘zbekistonda inson a’zolari va to‘qimalarini olish hamda ularning transplantatsiyasi davlat sog‘liqni saqlash tizimining tibbiyot muassasalari tomonidan amalga oshiriladi. Ushbu muassasalarning ro‘yxati Vazirlar Mahkamasi tomonidan belgilanadi. O‘zbekistonda “Inson a’zolari va to‘qimalarining transplantatsiyasi to‘g‘risida”gi qonunga ko‘ra, tirik donordan yoki inson murdasidan olingan inson a’zolari transplantatsiyasiga ruxsat berilgan.
Izoh (0)