O‘zbekistonlik dzyudochilar Osiyo-Okeaniya chempionatida 10 ta medal bilan jamoaviy hisobda 2-o‘rinni egalladi

Qirg‘izistonning Bishkek shahrida dzyudo bo‘yicha Osiyo-Okeaniya chempionati bo‘lib o‘tmoqda.

Ushbu musobaqada 29 mamlakatdan 195 nafar sportchi ishtirok etmoqda. O‘zbekiston terma jamoasi musobaqaning dastlabki uch kunida 10 ta medalni o‘z hisobiga yozdirib qo‘ydi: 3 ta oltin, 2 ta kumush va 5 ta bronza. O‘zbekiston umumjamoa hisobida 2-o‘rinni egalladi.

Birinchi o‘rinda Janubiy Koreya terma jamoasi (4 ta oltin, 5 ta kumush, 8 ta bronza) qayd etilgan.

Hozirda bu ko‘rsatkich O‘zbekiston terma jamoasining Osiyo chempionatlari tarixidagi eng yaxshi natijasi bo‘lib turibdi.

Sardor Nurillayev (-66 kg), Davlat Bobonov (-90 kg) va Gulnoza Matniyozova Osiyo chempioniga aylandi.

9-apreldan jamoaviy musobaqalar boshlandi. Dastlabki bellashuvda O‘zbekiston terma jamoasi Turkmanistonni 4:0 hisobida mag‘lubiyatga uchratdi.

Eslatib o‘tamiz, mazkur musobaqada Tokio—2020 Olimpiadasi uchun zaruriy reyting ochkolarini jamg‘arish imkonini beradi.