Jahon sog‘liqni saqlash tashkiloti (JSST) koronavirus infeksiyasining Amerika harbiy laboratoriyalaridan tarqaganligi ehtimolini o‘rganib chiqishi kerak, deb ta’kidladi Xitoy Tashqi ishlar vazirligining rasmiy vakili Xua Chunyin. Bu haqda “Korrespondent.net” xabar berdi.
“Laboratoriya sharoitida virus paydo bo‘lishi ehtimolining saqlanib qolishi to‘g‘risida gapirganda, mutaxassislar, agar zarurat bo‘lsa, butun dunyo bo‘ylab laboratoriyalarda tadqiqotlar olib borishini ta’kidladi. Barchamizga ma’lumki, bunday tadqiqotlar Uxan laboratoriyasida o‘tkazilgan. Lekin Fort-Detrik mutaxassislar uchun qachon ochiladi?” — dedi Chunyin OAV xodimlari bilan bo‘lgan uchrashuvda.
Shuningdek, u OAVda Fort-Detrik laboratoriyasi haqida ma’lumot yo‘qligini qo‘shimcha qildi.
“2019-yilning iyun oyida bu laboratoriya haqida yangiliklar paydo bo‘ldi, keyin yana yo‘qolib ketdi”, — dedi diplomat va Xitoy hukumatining koronavirus kelib chiqishini o‘rganishda JSST mutaxassislari bilan hamkorlikni davom ettirishga tayyor ekanini bildirdi.
“Bu tergov-surishtiruv ishlari emas, ilmiy tadqiqot. U global xarakterga ega bo‘lishi va dunyoning hech bir nuqtasida chegaralanmasligi kerak”, — dedi Xua Chunyin.
Ma’lumot uchun, AQShning Merilend shtatidagi Fort-Detrik laboratoriyasida Uolter Rid nomidagi quruqlik kuchlarining Ilmiy-tadqiqot instituti joylashgan. Muassasa Pentagonga bo‘ysunadi va biotibbiyot tadqiqotlari bilan shug‘ullanadi.
Avvalroq noma’lum xakerlar yangi turdagi koronavirusni tadqiq qilish bilan shug‘ullanayotgan Oksford universiteti laboratoriyasining kompyuter tizimiga hujum qilgani haqida xabar berildi. Hold Security asoschisi Aleks Holdenning so‘zlariga ko‘ra, kiberhujum fevral oyining o‘rtalarida COVID-19 ustida tadqiqot olib borayotgan Strubi nomi bilan tanilgan tizimli biologiya bo‘limida amalga oshirilgan.
Shuningdek, JSST mutaxassislari koronavirus infeksiyasi odamlarga to‘rt xil yo‘l — hayvondan, o‘zaro aloqa, muzlatilgan ovqatdan va laboratoriya hodisasi tufayli yuqishini aniqladi. Bu haqda Uxan shahridagi matbuot anjumanida so‘zga chiqqan JSST ekspertlari xalqaro guruhi rahbari Piter Ben Embarek ma’lumot berdi.
Izoh (0)