Germaniya hukumati biznesni qo‘llab-quvvatlash bo‘yicha yangi choralar haqida e’lon qildi. Kompaniyalarga 800 ming yevrogacha kredit beriladi

Germaniya hukumati kichik va o‘rta biznes uchun tezkor kreditlar berish dasturini tasdiqladi hamda bu orqali koronavirus infeksiyasi epidemiyasi sharoitida bozorda talab kamaygan vaqtda kompaniyalarni qo‘llab-quvvatlamoqchi. Bu haqda Reuters xabar bergan.

Mahalliy kompaniyalar dastur doirasida davlat tomonidan 100 foiz ta’minlab beriladigan kreditlar olishi mumkin. Qarzning miqdori kompaniyalarda ishlaydigan xodimlar soniga bog‘liq. 11 nafardan 50 nafargacha xodimi bo‘lgan korxonalar 500 ming yevrogacha kredit olsa, xodimlarining soni 50 nafardan 250 nafargacha bo‘lgan kompaniyaga 800 ming yevrogacha miqdorda qarz beriladi.

Mart oyida Germaniya hukumatida 600 milliard yevrolik iqtisodiy barqarorlik jamg‘armasi tashkil qilingan va u karantin sharoitida mahalliy kompaniyalarga ko‘mak berishi ko‘zda tutilgandi.

Germaniyada koronavirus yuqtirib olish holati 100 ming nafardan ko‘proq odamlarda kuzatilgan, shundan 1600 nafari kasallik oqibatida vafot etgan, 28 ming nafarga yaqin kishi COVID-19’dan tuzalgan. Hukumat qaroriga ko‘ra, xorijdan kelgan har bir mamlakat fuqarosi zudlik bilan karantinga yuboriladi.