APL. “Manchester Yunayted” yana mag‘lub bo‘ldi, “Lester” va “Tottenhem”da esa g‘alaba (video)

Futbol bo‘yicha Angliya Premyer ligasining 24-turi doirasida 22-yanvar, chorshanba kuni 3 ta o‘yin yakunlandi.

Brendan Rojers boshqaruvidagi “Lester” klubi o‘z maydonida “Vest Hem”ni sinovdan o‘tkazdi.

Uchrashuv davomida “tulkilar” vakillari Xarvi Barns (24), Rikardu Pereyra (45) hamda Ayose Peres (81—penalti, 88) raqib darvozasiga gol urgan bo‘lsa, londonliklarning goliga Mark Nobl (50—penalti) mualliflik qildi.

Shu tariqa “Lester” jamoasi o‘z uyida kechgan bahsda “Vest Hem”ni yirik 4:1 hisobida mag‘lub etdi va 3 ochkoni qo‘lga kiritdi.

Mazkur g‘alabadan so‘ng musobaqa jadvalida 3-o‘rinda borayotgan “Lester” ochkolari sonini 48 taga yetkazib oldi. “Vest Hem” esa 23 ochko bilan 17-o‘rinni egallab turibdi.

Joze Mourinyo boshliq Londonning “Tottenhem” klubi esa “Norvich”ga qarshi maydonga tushdi.

To‘qnashuvning 38-daqiqasida “shporlar” yarim himoyachisi Dele Alli hisobni ochgan bo‘lsa, 70-daqiqaga kelib “kanareykalar” hujumchisi Teyemu Pukki penaltidan Ugo Lyoris darvozasini aniq nishonga oldi. oradan 9 daqiqa o‘tib esa koreyalik Son Hyon Min London klubining g‘alaba goliga mualliflik qildi (2:1).

Ta’kidlash joiz, ushbu g‘alabadan keyin “Tottenhem”ning ochkosi 34 taga yetdi va jamoa musobaqa jadvalida 6-o‘ringa ko‘tarilib oldi. “Norvich” esa 17 ochko jamg‘arib so‘nggi o‘rinni band qildi.

Shu kuni Ole-Gunnar Sulsher qo‘l ostidagi “Manchester Yunayted” “Stemford Brij”da “Byornli”ni qabul qildi.

Bellashuvda mehmon jamoa a’zolari Kris Vud (39) va Jey Rodriges (56) David De Xea qo‘riqlayotgan darvozaga gol urdi.

Natijada “Yunayted” o‘z maydonida kechgan o‘yinda “Byornli”ga yutqazib qo‘ydi va ochko yo‘qotdi.

Ma’lumot uchun, “qizil iblislar” 34 ochko yig‘ib, Premyer ligada 5-o‘rinda bormoqda. “Byornli” esa 30 ochko to‘plagan holda 13-pog‘onadan joy oldi.