WBC yangilangan reytingida o‘zbekistonlik bokschilarning egallab turgan o‘rinlari ma’lum bo‘ldi

Butunjahon boks kengashi (WBC) iyun oyi uchun professional bokschilarning yangi reytingini e’lon qildi.

GoSport’ning xabar berishicha, o‘zbekistonlik besh nafar bokschi mazkur reytingdan o‘rin egallagan.

Super o‘rta (-76,2 kg) vazn toifasida ringga ko‘tarilayotgan o‘zbekistonlik Azizbek Abdug‘ofurov (12 ta g‘alaba, 4 ta nokaut) yangi reytingda bir oy oldingi pog‘onasini saqlab qoldi va 4-pog‘onadan joy oldi.

Yarim o‘rta (-66,68 kg) vazn toifasi vakili Qudratillo Abduqahhorov (16 ta g‘alaba, 9 ta nokaut) ham reytingda bir oy oldingi o‘rni — 4 o‘rnini saqlab qoldi. Ayni vaqtda u IBF reytingida birinchi, WBO reytingida esa 9-o‘rinlarni egallab turibdi.

Reytingning xalqaro miqyosida tan olingan Top-15 ligida boshqa o‘zbekistonlik bokschilar joy olmagan. Ammo WBC kengaytirilgan reytingda uch nafar o‘zbek bokschisi ham e’tirof etilgan.

WBC kengaytirilgan reytingidan super yengil (-63,5 kg) vazn toifasi vakili Shohjahon Ergashev (16 ta g‘alaba, 14 ta nokaut) 31-o‘rinda qayd qilingan. Ikkinchi yarim yengil (-55,34 kg) vazn toifasida ringga chiqayotgan Murodjon Ahmadaliyev (6 ta g‘alaba, 5 ta nokaut) mazkur reytingda 24-o‘rinda qayd qilingan bo‘lsa, super yengil (-63,5 kg) vazn toifasi vakili Shahram G‘iyosov (8 ta g‘alaba, 6 ta nokaut) 35-pog‘onadan joy olgan. Ahmadaliyev ayni vaqtda WBA yo‘nalishi reytingida 2-o‘rinni egallab turgan bo‘lsa, Shahram G‘iyosov o‘z vaznida 11-pog‘onani band qilgan.