AQSh prezidenti Donald Tramp Birinchi jahon urushi tugagan kunni nishonlashga bag‘ishlangan Fransiyadagi Jahon forumi davomida dunyo yetakchilari va hukumat rahbarlari bilan uchrashuvlarda ko‘p narsaga erishilganligini ma’lum qildi. Bu haqda “RIA Novosti” xabar bermoqda.
“Hozirgina Fransiyadan qaytdim. U yerda dunyo yetakchilari bilan uchrashuvlarim davomida ko‘p narsaga erishildi”, — deb yozdi Tramp Twitter’dagi sahifasida.
AQSh prezidentining so‘zlariga qaraganda, u, jumladan, xavfsizlik va boshqa mamlakatlar bilan savdo masalasini ko‘targan.
“Biz (AQSh) boshqa mamlakatlarni harbiy himoya qilish xarajatlarining katta qismi, yuzlab milliard dollarni to‘laymiz. Bu aynan shu mamlakatlar bilan savdoda yuzlab milliardlab dollarni yo‘qotish evaziga. Ularga bu vaziyat ortiq davom etishi mumkin emasligini aytdim… Katta miqdordagi pullar boshqa mamlakatlarni himoya qilish uchun sarflanmoqda, biz esa faqat savdo defitsitlari va yo‘qotishlariga ega bo‘lmoqdamiz. Bu juda boy mamlakatlar Qo‘shma Shtatlarga ularni harbiy qo‘llab-quvvatlagani uchun haq to‘lashi yoki o‘zini o‘zi himoya qilishi vaqti keldi…”, — deya qo‘shimcha qildi AQSh prezidenti.