Farg‘ona va Marg‘ilon shaharlarida birinchi xalqaro jang san’atlari festivali bo‘lib o‘tdi. Unda Janubiy Koreya, Gana, Mo‘g‘uliston, Filippin, Niderlandiya, AQSh, Rossiya, Belarus, Fransiya kabi dunyoning 30 dan ortiq mamlakatidan 150 dan ziyod sportchi va 500 ga yaqin mehmonlar ishtirok etdi, deb xabar beradi “Daryo” muxbiri Azizjon Ermatov.
Xalqaro festival avvalida YUNЕSKO homiyligi ostida jahon jang san’atlari uyushmasiga a’zo davlatlar 17-Bosh assambleyasi yig‘ilishi o‘tkazildi. Unda jahon jang san’atlari uyushmasiga a’zo 26 ta davlat vakillari qatnashdi.
Shuningdek, “Jang san’ati va ipak yo‘lidagi madaniyat” mavzusida akademik seminar bo‘lib o‘tdi. Unda jahon jang san’ati tarixi, ipak yo‘li va jang san’ati, o‘tkazilayotgan chempionatlar, o‘yin qoidalari, YUNЕSKO va nomoddiy madaniy meros kabi masalalar bo‘yicha ma’lumot berildi.
Janubiy Koreyaning Chung Ju shahar hokimligi va Takkyon uyushmasi hamda “O‘zbek jang san’ati” federatsiyasi va Farg‘ona viloyati hokimligi o‘rtasida memorandum imzolandi.
Urf-odatlarimizga ko‘ra, mehmonlarga milliy liboslar, milliy hunarmandchilik namunalari va “O‘zbek jang san’ati” sport formalari topshirildi.
Festival ishtirokchilari Marg‘ilon shahridagi 2-bolalar va o‘smirlar sport maktabida o‘zbek jang san’ati bo‘yicha sportchilarning ko‘rgazmali chiqishlarini kuzatdi.
Shuningdek, mazkur sport maktabida 20 dan ortiq davlat sportchilari o‘zlarining urf-odati, tarixi va jang san’atini namoyon etuvchi ko‘rgazmali chiqishlarini namoyish qildi. Janubiy Koreya, AQSh, Indoneziya, Mo‘g‘uliston hamda o‘zbekistonlik sportchilarning dasturlari yuqori baholandi.
Kecha, 30-iyul sanasida Islom Karimov nomidagi viloyat teatr-konsert saroyida I xalqaro jang san’atlari festivalining taqdirlash marosimi o‘tkazildi.
Jahon jang san’ati uyushmasining prezidenti Chong Xua, Keniya “Jang san’ati” uyushmasining vitse-prezidenti Kennedi Joshua Ojvando, “O‘zbek jang san’ati” federatsiyasi raisi Po‘lat Usmonov va Farg‘ona viloyati hokimining o‘rinbosari Ilhomjon Nosirov g‘oliblarni taqdirladi.
Festival davomida o‘zining qiziqarli chiqishlari bilan e’tibor qozongan sportchilar “O‘zbek jang san’ati” uyushmasining medallariga ega bo‘ldi.
– Har yili Janubiy Koreyada o‘tkaziladigan festivalni bu yil O‘zbekistonga – Farg‘ona viloyatiga ishonib topshirgandik. Chunki, farg‘onalik sportchilar har yili mazkur festivalda o‘z chiqishlarini mohirona namoyish qilib, muvaffaqiyatli ishtirok etgan. Farg‘onada xalqaro festivalga juda yuqori darajada tayyorgarlik ko‘rilibdi, – deydi Janubiy Koreya delegatsiyasi rahbari Chyo Gil Xyong.
Izoh (0)