Respublika ishchi guruhi o‘rganishlar chog‘ida “Ko‘kmozor” mahalla fuqarolar yig‘ini Zebo Xoliqova ko‘chasi 39-uyda joylashgan Namangan viloyati o‘rta maxsus kasb-hunar ta’limi boshqarmasi Norin pedagogika kolleji Axborot resurs markaziga qarashli 2-sonli filial binosining qarovsiz va tashlandiq holda yotganiga guvoh bo‘ldi, deb yozadi O‘zA.
Sobiq dala shiyponi o‘rnida tashkil etilgan kutubxona 2006—2013-yillarda Norin tumani axborot resurs markazi ixtiyorida bo‘lgan. Avvaliga bitta mudir va bir nafar yordamchi ishlagan. 6 528 dona kitob fondi ham bo‘lgan. Ammo ulardan hozir asar ham yo‘q.
“Ko‘kmozor” mahallasi xotin-qizlar bilan ishlash va oilalarda ma’naviy-axloqiy qadriyatlarni mustahkamlash bo‘yicha mutaxassisi Maryamxon Ismanovaning aytishicha, kutubxona 3—4 yildan buyon umuman ishlamaydi. Eshiklar ham mix bilan qotirib tashlangan. Vaholanki, 16 ming fuqaro yashaydigan atrofdagi 6 ta (“Ko‘kmozor”, “Qo‘rg‘oncha”, “Shohidon”, “Kemaboshi”, “Marg‘izor”, “Toshqin”) mahallada birorta ham ma’rifat o‘chog‘i yo‘q.
Kollejning Axborot resurs markazi rahbari Muqaddas Yodgorovaning oydinlik kiritishicha, 2006-yilda filiallar uning balansiga o‘tganida jami 18 nafar kutubxonachi ishlagan. Har yili shtatlarni optimallashtirish jarayonida ular soni qisqarib boravergan. Hozirda ARMida to‘rt nafar xodim ishlamoqda. Oqibatda shtat qisqargach, kutubxona ham qarovsiz qolgan. Kitoblari esa tumanda yangi tashkil qilingan kutubxonalarga berib yuborilgan. Hozir ushbu kollej kutubxonasida ham ko‘p emas, jami 7 281 ta kitob bor. Ularning olti yuzdan ortig‘i badiiy kitoblardir.
Aniqlanishicha, kollejda o‘quvchilar soni esa 742 nafar. Bir nafar o‘quvchiga bitta ham badiiy kitob to‘g‘ri kelmaydi. 2012—2015-yilgacha jami 312 ta badiiy kitob darsliklar bilan bepul keltirilgan. 2018 va 2016-yillarda kollej birorta kitob olmagan. 2017-yilda 13 ta badiiy adabiyot qabul qilingan.
Norin tumani xalq ta’limi bo‘limi kutubxonalar bo‘yicha metodisti Jannatxon Hakimovaning aytishicha, Yoshlar Ittifoqi bilan hamkorlikda shu yil aprel oyida tuman fermerlari tashabbusi bilan Norin tuman markazida (2 744 dona), “Qozoqovul” (2 300 dona) va “Toshloq” mahallasida (3 300 dona), “To‘da” mahallasida (1 700 dona) jami 4 ta yangi aholi kitobxonasi ochilgan. Kollej filiallaridagi 40 ming kitobning chirib, sarg‘ayib, bir-biriga yopishib ketgan, yaroqsiz holatga kelib qolganlari dalolatnoma qilinib, tashlab yuborilgan.
Norin tumani yer tuzish va ko‘chmas mulk kadastri filiali mutaxassisi Botir Xolmirzayev esa bino uzoq yillardan buyon hech kimning balansida emasligini bildirgan.
Ishchi guruhi mahalladan tadbirkor topib, bu yerda kitob do‘koni yoki kutubxona tashkil qilishga tavsiya berdi.
Izoh (0)