Kubalik bokschilarni taslim qilgan Uzbek Tigers bugun Kolumbiyadan kelgan charm qo‘lqop ustalarini sinovdan o‘tkazadi

WSB musobaqasining 2-turida Cuba Domadores klubini mag‘lub etib, okean ortidagi mag‘lubiyat alamini olgan Uzbek Tigers bugun — bahorning ilk kunida Colombia Heroicos bokschilarini qabul qiladi.

Yakuniy hisob: Uzbek Tigers — Cuba Domadores 4:1. So‘nggi jangda Sanjar Tursunov Erislandi Savonni taslim qildi

Boks oqshomiga yana bir bor Toshkentdagi “Universal” sport saroyi mezbonlik qiladi. U 19:00 da boshlanadi.Kolumbiyaliklarga qarshi janglarni Kubada mag‘lub bo‘lgan o‘zbekistonlik bokschilar o‘tkazadi. Tarkibda faqatgina 1 ta o‘zgarish bor. -81 kilogramm vazn toifasida ringga chiquvchi Bektemir Meliqo‘ziyev Kubaga bora olmagandi. Endi esa u jarohatidan forig‘ bo‘lib, Toshkentda jang qilishga tayyor bo‘lib turibdi.

Uzbek Tigers — Colombia Heroicos

• -52 kg: Xudoynazar Fayzov — Keybar Avila
• -60 kg: Shunqor Abdurasulov — Duvan Zuleta
• -69 kg: Mahmud G‘oipov — Aleksandr Ranxel
• -81 kg: Bektemir Meliqo‘ziyev — Diyego Motoa
• +91 kg: Bahodir Jalolov — Kristian Salkedo

MOQ matbuot xizmatining xabar berishicha, xuddi o‘tgan gal bo‘lgani kabi, “Universal” sport majmuasiga bu safar ham urush va mehnat faxriylari, mehribonlik uyi tarbiyalanuvchilari hamda jismoniy imkoniyati cheklangan bolalar ham tashrif buyuradi.

Colombia Heroicos bungacha Caciques Venezuela bilan ikkita jang o‘tkazdi. Birida kolumbiyaliklar, ikkinchisida esa venesuelaliklar 3:2 hisobida zafar quchdi. Kolumbiyaliklar, shuningdek, Kubada 0:5 hisobida yengilgandi.