MOQ prezidenti va o‘zbekistonlik mashhur sportchilar maktab-internatga borib, ko‘zi ojiz bolakaylar ko‘nglini oldi

Milliy olimpiya qo‘mitasi prezidenti Umid Ahmadjonov bugun — 5-fevral sanasida Olimpiada o‘yinlari sovrindorlari, Osiyo chempioni bo‘lgan futbolchilar va murabbiylar bilan birgalikda Toshkentdagi 100-ixtisoslashtirilgan maktab-internati hamda ko‘zi ojizlar maktab-internatiga tashrif buyurdi. Bu haqda MOQ matbuot xizmati xabar berdi.

Internatlarda tarbiyalanayotgan imkoniyati cheklangan bolalar mamlakatning ayni vaqtdagi eng mashhur sportchilari qo‘lidan O‘zbekiston Prezidenti sovg‘alari — futbol to‘plari, sport anjomlari va faxriy yorliqlarni qabul qilib olgan.

Huzuringizga yurtimizning mashhur sportchilari, yaqindagina Osiyo chempioni bo‘lgan futbolchilar va murabbiylar bilar birga keldik. Nasib etsa, sizlar bilan yil davomida muntazam ko‘rishib turamiz. Kelgusida sizlar ham mashhur sportchi bo‘lib, yurtimiz sharafini xalqaro maydonlarda himoya qilib yurishingizni tilaymiz. Birgalikda O‘zbekiston sportini va futbolini yuqori pog‘onalarga olib chiqamiz.

Umid Ahmadjonov, MOQ prezidenti

Ahmadjonovning topshirig‘iga ko‘ra, endilikda futbol bo‘yicha milliy chempionat o‘yinlariga ixtisoslashtirilgan maktab-internatida tarbiyalanayotgan bolalarni olib borish yo‘lga qo‘yiladi. Shuningdek, MOQ hisobidan maktab-internatlardagi bolajonlarni xalqaro musobaqalarga olib borish amaliyoti ham joriy etilishi katta ehtimol.

O‘z navbatida bolajonlar maktab-internatiga tashrif buyurgan mehmonlarga ko‘rgazmali chiqishlarini namoyish etib bergan. Sport yulduzlari esa ularning har bir harakatini olqishlab turdi.

Olmazor tumanidagi 100-ixtisoslashtirilgan maktab-internatida respublikaning turli viloyatlaridan kelgan 365 nafar o‘quvchi tahsil oladi. Bugungi uchrashuvdan bolajonlar bir olam taassurot olishdi. Ular hayajonlarini yashira olmayotgani shundoq ko‘rinib turibdi. Axir ular har kuni ham Prezidentimiz nomidan, sportimiz yulduzlari qo‘lidan sovg‘a-salomlar olishmaydi. Bunday e’tibor uchun eng avvalo yurtboshimizga, qolaversa Milliy olimpiya qo‘mitasiga minnatdorchilik izhor etamiz.

Tohir Matyaqubov, maktab-internat rahbari

Shundan so‘ng MOQ rahbariyati va sportchilar poytaxtdagi Ixtisoslashtirilgan ko‘zi ojizlar maktab-internatiga yo‘l oldi.

Maktabimizda 330 nafar o‘quvchi tahsil oladi. Ularning ta’lim-tarbiya olishi, bo‘sh vaqtini mazmunli o‘tkazishi uchun barcha sharoitlar yaratilgan. Shuningdek, maktabgacha bo‘lgan tayyorlov guruhlarimiz ham bor. Ko‘rsatilayotgan e’tibordan juda mamnunmiz. Sizlarga katta rahmat!

Mavlon Maqsudov, maktab-internat direktori

Bugungi tadbirlarda taekvondo bo‘yicha jahon chempioni, ikki karra Osiyo chempioni Dmitriy Shokin, sportning ushbu turi bo‘yicha Jahon Chempionati sovrindori, Osiyo chempioni, Osiyo O‘yinlari g‘olibi Jasur Boyqo‘ziyev, boks bo‘yicha Osiyo chempioni Isroil Madrimov, boks bo‘yicha Jahon Chempionati sovrindori Sanjar Tursunov, dzyudo bo‘yicha Olimpiadaning uch karra bronza medali sovrindori, ikki karra jahon chempioni Rishod Sobirov, stol tennisi bo‘yicha yoshlar o‘rtasida jahon chempioni Saida Mahmudova, futbol bo‘yicha o‘smirlar o‘rtasida jahon va Yevropa chempioni, Osiyo O‘yinlari g‘olibi Mirjalol Qosimov, 23 yoshgacha bo‘lgan futbolchilar o‘rtasida Osiyo chempionligiga erishgan O‘zbekiston termasi bosh murabbiyi Ravshan Haydarov, ushbu terma a’zolaridan Rustam Ashurmatov, Xojiakbar Alijonov, Andrey Sidorov, Zabihillo O‘rinboyev va Jasur Yaxshiboyev ishtirok etgan.