“O‘zavtosanoat” Qozog‘istonda avtomobil sanoatini rivojlantirishga yordam beradi

“O‘zavtosanoat” AJ Qozog‘istonning Allur Group kompaniyasi bilan hamkorlik to‘g‘risida memorandum imzoladi. Bu haqda kompaniya matbuot xizmati ma’lum qildi.

Hujjat “O‘zavtosanoat” boshqaruvi raisi o‘rinbosari Rustam Yusupov va Allur Group biznesni rivojlantirish bo‘yicha vitse-prezidenti Yuriy Afanasyev tomonidan imzolandi.

Shuningdek, Allur Group “O‘zavtosanoat” bilan hamkorlikda Qozog‘iston bozoridagi xaridlar hajmini oshirish borasida uzoq istiqbolli hamkorlik strategiyasini ishlab chiqayotgani aytildi.

Memorandum savdo, savdo-vositachilik, tovar ayirboshlash operatsiyalarining o‘tkazilishini, qo‘shma eskport-import loyihalarini, axborot almashishni va xizmatlar ko‘rsatishni nazarda tutadi.

Bundan tashqari, tomonlar Qozog‘istonda ishlab chiqariladigan avtomobillar modellarini ko‘paytirish imkoniyatlarini o‘rganmoqda.