Rossiyaning Vladimir viloyatida 6-oktabr kuni yuz bergan yo‘l-transport hodisasi oqibatida o‘zbekistonlik 16 kishi halok bo‘lgan, 36 kishi yengil tan jarohati olgan, 3 kishi shifoxonaga yotqizilgan edi. 8-oktabrga o‘tar kechasi O‘zbekistonning maxsus samolyoti avariyaga uchragan 36 fuqaro va 15 jasad bilan O‘zbekistonga qaytdi.
Foto: “O‘zbekiston 24” (arxiv)
O‘zbekiston Tashqi ishlar vazirligi matbuot xizmatining xabar berishicha, O‘zbekiston va Rossiya sog‘liqni saqlash vazirliklarining o‘zaro kelishilgan qaroriga ko‘ra, O‘zbekistonning uch nafar fuqarosi — og‘ir ahvoldagi voyaga yetgan ikki kishi va besh yashar qizaloq — sog‘aytirish uchun Vladimir viloyatining klinik shifoxonasida qoldirildi.
“Ularni davolash uchun yuqori malakali mutaxassislar jalb etiladi”, — deyiladi O‘zbekiston TIV matbuot xizmati axborotida.
Ma’lumot uchun, ahvoli og‘ir deb baholangan 2012-yilda tug‘ilgan Gulruh Ziyodullayeva, 1976-yilda tug‘ilgan To‘lqin Tojiyev hamda 1974-yilda tug‘ilgan Mirjon Latipov ayni vaqtda Rossiyada davolanmoqda.
Mavzuga doir: TIV Rossiyadagi YTHda halok bo‘lgan va jabrlangan o‘zbekistonliklarning ismlarini e’lon qildi
Qayd etish joiz, bir muddat avval qurbon bo‘lgan 16 nafar o‘zbekistonlikdan biri Mirjon Latipovning 1997-yilda tug‘ilgan o‘g‘li — Mirshod Mirzoyev ekani ma’lum bo‘lgan edi.
Shuningdek, qurbonlar orasida familiyasi og‘ir ahvoldagi Gulruh Ziyodullayevaniki bilan bir xil, otasining ismi Gulruhniki kabi Mashrab bo‘lgan, 2011-yil 24-iyun tug‘ilgan Gulsanam ismli qiz ham bor. U Surxondaryo viloyatining Muzrabot tumanidan bo‘lgan.
Bundan tashqari, YTH oqibatida halok bo‘lganlar bolalar orasida 2015-yil 18-may kuni Rossiyada tug‘ilgan, Surxondaryo viloyati Muzrabot tumanida doimiy ro‘yxatda turgan Davlatbek Tangriqulov Mashrabovich ham bor.
