2-sentabr kuni “Zakovat” intellektual shousining ilk ishtirokchilardan biri Farhod Akbarov olamdan o‘tdi. Bu haqda bloger Xushnudbek Xudayberdiyev Facebook’dagi sahifasi orqali ma’lum qildi.
Farhod Akbarov endigina 38 ga kirgan edi. Uning vafotiga nima sabab bo‘lgani aytilmadi.
Farhod Akbarov “Zakovat”da 2001–2005-yillarda ishtirok etgan va o'z jamoasi bilan bir necha marta chempion bo'lgan.
“Farhod Akbarov ko‘pchilik ‘Zakovat’ bilimdonlari singari shaxsan men uchun ham haqiqiy afsona edi! Aynan ularning o‘yinlarini ko‘rib, ularning bilimdonligiga havas qilib, qalbimizda ‘Zakovat’ga bo‘lgan mehr, ishtiyoq paydo bo‘lgan. ‘Zakovat’ga dastlabki yillaridan muxlis bo‘lgan inson borki, hammasi Farhod Akbarov jamoasining o‘yinidan rohat olishgan, o‘zgacha shavq bilan tomosha qilishgan. Dastlabki taassurot kuchli bo‘ladi, deyishadi. ‘Zakovat’ning ilk yillari Farhod Akbarov kabi kuchli bilimdonlar bilan boshlangani ko’rsatuvning kelajagi uchun katta yutuq bo‘lgan, deb bemalol aytish mumkin”, — deb yozadi Xushnubdek Xudayberdiyev.
Shuningdek, Facebook’dagi “Zakovat intellektual ko‘rsatuvi” guruhi ham Farhod Akbarovning vafoti munosabati bilan marhumning oila-a’zolariga hamdardlik bildirdi.
‘Zakovat’ intellektual ko‘rsatuvining ilk qaldirg‘och bilimdonlaridan biri bo‘lgan Farhod Akbarovning vafoti munosabati bilan ularning oila a’zolari va yaqinlariga hamdardlik bildiramiz.Mazkur xabar butun klub a’zolarini chuqur qayg‘uga soldi.Farhod Akbarovning yorqin xotirasi qalbimizda hamisha saqlanib qoladi.Hurmat bilan,‘Zakovat’ intellektual klubi a’zolari.
Izoh (0)