Rossiya mezbonlik qilgan futbol bo‘yicha Konfederatsiyalar kubogi—2017 o‘z yakuniga yetdi.
Musobaqaning finaliga qadar Germaniya va Chili termalari yetib keldi. Mazkur ikki mamlakat bunga qadar bitta guruhda kurash olib borgan bo‘lib, undagi o‘zaro o‘yinda 1:1 hisobi qayd etilgan, keyinroq Germaniya guruhni 7, Chili esa 5 ochko bilan yakunlagandi.
Final bellashuvida uchrashuv taqdirini birgina gol hal qildi va bunga chililik futbolchilar javob qaytara olmadi. Natijada Germaniya terma jamoasi Konfederatsiyalar kubogi g‘olibligini qo‘lga kiritdi. Nemislar musobaqada jahonning amaldagi chempioni sifatida ishtirok etgandi.
Turnir oldidan Germaniya terma jamoasi bosh murabbiyi Ioxim Lyov bir yillik mavsumni yakunlagan yetakchi futbolchilarga dam berishga qaror qilib, ularning o‘rnini bosishi kerak bo‘lgan tarkib bilan Rossiyaga borishga qaror qilgandi. Olti qit’a chempionlariga qarshi chiqib kelgan Germaniya termasi asosiy futbolchilarisiz ham yakunda muvaffaqiyat qozona oldi.
1992-yildan buyon o‘tkazib kelinadigan Konfederatsiyalar kubogida Germaniya termasi birinchi bor g‘oliblikni qo‘lga kiritdi. Bu borada Braziliya hisobida 4 ta, Fransiyada 2 ta, Argentina, Daniya va Meksika termalarida 1 tadan chempionlik bor.
Izoh (0)