Stiv Jobs izidan: har kuni bir xil kiyim kiyish uchun 5 ta sabab

InsiderPro nashri yozuvchi va mashhur minimalist Joshua Bekerning ortiqcha narsalardan voz kechishga qaror qilish orqali nimalarni qo‘lga kiritish mumkinligi haqidagi fikrlarini taqdim etadi.

Bir necha yil avval har kuni aynan bir xil kiyim — to‘q kulrang futbolka va mosh rang shim kiya boshladim. Dastlab buni bir haftalik tajriba sifatida sinab ko‘rmoqchi va bunga odamlar nima deyishini bilmoqchi bo‘ldim.

Har kuni ulardan biri va nihoyat: “Yetar, Joshua! Nega yana shu kiyimdasan?” deyishini kutdim. Balki menga aytishmasa ham, ichlarida shunday o‘ylashi aniq.

Ijtimoiy me’yorlar va odatlar xaridlarimizga kuchli ta’sir ko‘rsatadi. Brendlar assortimentini doimiy yangilab turish uchun mavsumiy kiyimlar kolleksiyasi va aksessuarlarni faol taklif qiladi. Bugun kirgan do‘koningiz bir haftadan so‘ng tanib bo‘lmas darajada o‘zgarib ketadi. Garderobingiz ham aynan shu tarzda har oy, mavsum, yil o‘zgarib borishi mumkin.

Zamonaviy jamiyatda qabul qilingan me’yorlar tufayli barcha menga boshqacha qarayotgandek va muhokama qilayotgandek tuyuldi.

Biroq tajribamning bir haftasi mobaynida hech kim hech qanday fikr bildirmadi.

Va bu jimlik meni ozod qildi.

Haqiqatda ko‘pchilik o‘z tashqi ko‘rinishi haqida shunchalik ko‘p o‘ylanadiki, sizning kamchiliklaringizni payqashga vaqt topmaydi — psixologlar “projektor effekti” deb atovchi holatga yorqin misol.

Bu ijtimoiy me’yorlarni buzish orqali siz majburiy qarashlardan xalos bo‘lasiz.

Agar garderobingizni tozalash, universal kiyim tanlashga qaror qilgan bo‘lsangiz yoki kamroq kiyim kiyish haqida o‘ylab, biroq ikkilanayotgan bo‘lsangiz, quyida tajribamga ergashish uchun beshta sabab keltirib o‘taman:

1. Qarorlar qabul qilishda yengillik

Bundan keyin nima qilish kerakligi haqida hatto tushimizda ham o‘ylab chiqamiz. Bu jarayon bizni holdan toydiradi. Jiddiyroq oqibatlarga olib keladigan qarorlar esa ko‘proq quvvat talab qiladi. Doimiy bosimdan charchagan odamlar yaxshi o‘ylab ko‘rilmagan ishlarni sodir etadi. Bu juda ahamiyatsiz narsadek tuyulsa-da, universal va bir xil kiyim tanlovi hayotingizni yengillashtirishi mumkin.

2. Shaxsiy qiyofa

Minimalizm tarafdori bo‘lganligim uchun universal asos qidira boshladim. O‘zimni sinab ko‘rish uchun aynan bir xil kiyimni hafta davomida kiyib yurdim. Bundan zerikamanmi? Bu kiyim haqiqatdan ham menga yarashadimi? Yana qaysi kiyim menga ko‘proq yoqishini tushunib yetdim. O‘z uslubingizni topish bir muncha vaqt olishi mumkin, biroq ishonch va qulaylik tuyg‘usi jangovar ruhni ko‘taradi.

3. Ortiqcha hech narsa

Minimalizm ortiqcha narsalarni chetlab o‘tib, asosiylariga e’tibor qaratishga yordam beradi. Bu tamoyil turli vaziyatlarda, ayniqsa kiyim tanlashda ish beradi. Ko‘p yillar davomida ushbu falsafani qo‘llab, ivirsib ketishdan qochdim. Asta-sekinlik bilan eng muhim narsalarga e’tibor qarata boshladim. Shkafim har qachongidan ham kichik va sarishtaroq bo‘ldi. “Bugun nima kiysam?” degan savolga javob topish bundan buyon vaqtimni olmaydi.

4. Sifatga urg‘u berish

Do‘stlarimni hammadan ko‘p qadrlayman. Ularni tanlashda shubhasiz soniga emas, sifatiga e’tibor qarataman. Kiyim tanlashda ham aynan shu tamoyilni qo‘llash orqali sevimli lisoblaringizni aniqlab olishingiz mumkin.

Yangi kiyim olish uchun yo‘l olganingizda, ularni bir necha yildan keyin shkafingizda tasavvur qiling. Ular o‘shanda ham sizga ma’qul keladimi? Moda ketidan quvish qiyin, buning ortidan kasodga uchrash ham mumkin. Buning o‘rniga bir necha yil xizmat qilishi mumkin bo‘lgan sifatli mahsulotlarga urg‘u bering.

5. Kamroq kir yuvish va ko‘proq bo‘sh vaqt

Bir haftadan so‘ng ko‘ylak va djinsini kir yuvish mashinasiga soldim. Kamroq kiyimdan foydalanish kamroq tashvish hosil qiladi. Oilam bilan vaqt o‘tkazish uchun bo‘sh vaqt paydo bo‘ldi. Kiyimlarni yarim kun davomida yuvish, quritish va taxlash o‘rniga endi o‘ynash, mutolaa qilish va eshitish imkoniga ega bo‘ldim.

Ko‘pchilik mashhur va muvaffaqiyatli kishilar shkafida juda kam narsa saqlaydi — buning jiddiy sabablari bor. Bu borada eng mashhur shaxs Stiv Jobs bo‘lsa kerak. Taqdimot, konferensiya va boshqa tadbirlarda u doim qora vodolazka, ko‘k djinsi va aylana ko‘zoynaklarda paydo bo‘lar edi. U bir xil kiyim kiyganligi uchun muvaffaqiyatga erishmagan albatta, biroq bu orqali juda band odamning muammolari bittaga kamaygan.

Bir xil kiyimni har kuni kiyish orqali siz uchun nima muhim ekanligini anglab yetasiz. Va bu kiyim bo‘lib chiqmaydi.