General Motors Venesueladagi faoliyatini to‘xtatdi
General Motors, mamlakat rasmiylari korxona ishiga taqiq qo‘ygani va mol-mulkini musodara qilganidan so‘ng, Venesueladagi faoliyatini to‘xtatdi. Bu haqda kompaniya tomonidan tarqatilgan bayonotda ma’lum qilindi, deya xabar beradi “TASS”.
“Venesuela Oliy sudi GM tomonidan berilgan da’voni qaytarganidan so‘ng, mamlakat rasmiylarining himoyaga bo‘lgan qonuniy huquqqa nisbatan bepisand qarashi namoyon bo‘ldi. Kompaniya ish o‘rinlari yaratish, Venesuela iqtisodiyotining barcha sektorlari mobilligini ta’minlashga qo‘shgan hissasidan 69 yil o‘tib, o‘z faoliyatini to‘xtatadi”, — deyiladi bayonotda.
General Motors’ning Venesuela shimolidagi Valensiya shahrida joylashgan korxonasida 2,6 mingdan ortiq kishi ishlardi. Kompaniya uning ishi to‘xtatilganidan ko‘riladigan zarar 100 million dollarga yetishini taxmin qilmoqda.
