“Toshkent aeroporti” va 4 temir yo‘l posti skanerlovchi uskunalar bilan jihozlanadi

O‘zbekiston Prezidenit 24-may kuni “O‘zbekiston Respublikasi bojxona postlari jihozlash uchun Xitoy Xalq Respublikasi hukumati tomonidan taqdim etilayotgan grantdan samarador foydalanilishini ta’minlash chora-tadbirlari to‘g‘risida”gi qarorni imzoladi. Bu haqda “Novosti Uzbekistana” xabar bermoqda.

Grant tarkibiga to‘rtta yirik gabaritli inspeksion-nazorat kompleksi kiradi. Ular “O‘zbekiston”, “Bekobod” (Toshkent viloyati), “Xo‘jadavlat” (Buxoro viloyati) va “Sariosiyo” (Surxondaryo viloyati) temir yo‘l chegara bojxona postlarida o‘rnatiladi.

Yana o‘nta skanerlovchi tizim komplektlari “Toshkent xalqaro aeroporti” chegara bojxona postida joylashtiriladi.

XXR tomonidan taqdim etilayotgan grant o‘z ichiga uskunalar uchun ehtiyot qismlarni, ularning montaji va ishga tushirish va sozlash ishlarini, kafolatli xizmat ko‘rsatishni va operatorlarni o‘qitishni qamrab oladi. Grantning umumiy qiymati — 126 million yuan yoki 18,3 million dollardir.