Avstraliyalik fuqaroning mashinasi iPhone 7 ning portlashi oqibatida yonib ketdi (foto va video)
Avstraliya fuqarosi Met Jonsning avtomobili iPhone 7 smartfonining portlashi oqibatida yonib ketdi, deb xabar bermoqda “Hi-Tech Mail.ru”.
Qurilma egasining ma’lum qilishicha, u iPhone 7 ni avtomobil saloni ichidagi kiyimlar orasida qoldirib, syorfing bilan shug‘ullanishga ketgan. Qaytib kelganida esa dahshatga tushgan: uning mashinasi salonidan tutun chiqayotgan edi.
Avtomobil salonining qariyb yarmi yonib ketdi. Jons yong‘inni bartaraf etganidan so‘ng mashinani sinchiklab tekshirdi va aynan iPhone 7 yong‘inga sababchi bo‘lgan deb hisobladi.
Met Jonsning aytishicha, u hech qachon qalbaki quvvatlantiruvchi qurilmalardan foydalanmagan.
Apple vakillari hodisadan xabardor ekanini ma’lum qildi va voqea sabablarini o‘rganish uchun Jons bilan hamkorlik qilishga tayyor ekanini bildirdi.
