O‘zbekiston Respublikasi Mustaqilligining 25 yilligini nishonlash tadbiri doirasida maxsus pochta markalari turkumi “O‘zbekiston pochtasi” aksiyadorlik jamiyati tomonidan tayyorlanib, O‘zbekiston Respublikasi axborot texnologiyalari va kommunikatsiyalarini rivojlantirish vazirligi tomonidan 2016-yil 31-avgustdan muomalaga kiritildi. Bu haqda “O‘zbekiston pochtasi” matbuot xizmati xabar bermoqda.
Ushbu pochta markalarida mustaqillik davrida qurilgan zamonaviy arxitektura bino va inshootlari, sanoat va mashinasozlik rivoji hamda iqtisod, sog‘liqni saqlash, sport, ta’lim sektorlari tasvirlangan.
Turkum 8 ta pochta markasidan iborat (markazida kuponi bilan), kichik varaq ko‘rinishida tayyorlangan.
Kuponda Mustaqillik monumenti oldidan joy olgan farzandini bag‘riga bosib turgan Baxtiyor ona siymosi tasviri tushirilgan bo‘lib, ingliz tilida “O‘zbekiston Respublikasi Mustaqilligining 25 yilligi” matni joylashgan.
Pochta markalari va kupon bir necha rangda ishlangan. Ofset usulida bosilgan. Perforatsiyasi taroqsimon. Pochta markalarining o‘lchami 42x30mm, kichik varaqning o‘lchami 180x150mm. Adadi 8000 nusxa.
Identifikatsiya raqamlari berilgan va nominallar o‘rnatilgan.
Izoh (0)