Navoiyda ta’lim muassasalarini kuz—qish mavsumiga tayyorlash yakuniga yetkazilmoqda

Navoiy viloyati xalq ta’limi muassasalarida kuz—qish mavsumiga tayyorgarlik ishlari yakuniga yetkazilmoqda, deya xabar bermoqda O‘zA.

Viloyatda iqtisodiyot tarmoqlari va ijtimoiy sohalarni 2016—2017-yillar kuz—qish davrida barqaror ishlashga tayyorlashni ta’minlash maqsadida izchil chora-tadbirlar amalga oshirilmoqda.

Xususan, ta’lim muassasalarini tayyor holatga keltirish uchun qariyb 8 milliard 810 million so‘m ajratilgan. Shuningdek, 15 ta’lim maskanini joriy ta’mirlash maqsadida 1 milliard so‘mdan ortiq mablag‘ yo‘naltirildi. 24 muassasadagi 71 isitish qozoni to‘liq yangisiga almashtirildi. Yaroqsiz eshik, deraza va oynalar yangilandi.

Kuz—qish mavsumida tog‘ va cho‘l hududlaridagi ta’lim muassasalarida muqobil yoqilg‘i manbalaridan keng foydalaniladi. Shu bois mazkur hududlarda ham mavsumga puxta hozirlik ko‘rildi.