AQShning Sietl shahrida shirinliklar ishlab chiqaruvchi Mars kompaniyasining xo‘jayinlaridan biri kichik Forrest Edvard Mars 26-iyul, seshanba kuni yurak xurujidan vafot etdi. Bu haqda The New York Times xabar bermoqda.
Kichik Forrest Edvard Mars kompaniya asoschisining nevarasi bo‘lgan. U 30 yil davomida singlisi Jaklin va ukasi Jon Marslar bilan kompaniyani boshqarib kelgandi.
Bloomberg Billionaires Index ma’lumotlariga ko‘ra, kichik Forrest Edvard Marsning moliyaviy holati 31,5 milliard dollarni tashkil etadi. U dunyodagi eng boy insonlar ro‘yxatida 21-o‘rinni egallagandi. Marslar oilasi AQShda eng boy oilalarning uchligiga kiradi.
Mars kompaniyasiga 1911-yilda asos solingan. Kompaniya asoschilari Frenk Mars va uning turmush o‘rtog‘i Etel ularning tashkilotiga shuhrat va pul keltirgan Milky Way shokolad batonchasini o‘ylab topib, uni ishlab chiqardi. Mars kompaniyasining keyingi mashhur mahsuloti 1941-yilda ishlab chiqarilgan M&M’s shirinliklari bo‘ldi.
Hozirgi kunda kompaniya Snickers, Orbit, Dove, Pedigree, Royal Canin, Whiskas kabi brendlarga egalik qiladi.
Izoh (0)