Pol Pogbani o‘z safiga qo‘shib olishni istayotgan “Manchester Yunayted” klubi “Yuventus” bilan bog‘lanmagan. Bu haqda Turin klubi bosh direktori Juzeppe Moratta SportItalia nashriga bergan intervyusida ma’lum qildi.
Avvalroq Fransiyaning L'Équipe nashri Pogba “Yunayted” safiga 120 million yevro evaziga o‘tayotgani haqida yozgandi. Unda keltirilishicha, Pogba Manchesterga ko‘chib o‘tish niyatida ekanini ma’lum qilib, bu borada tomonlar kelishuvga erishganini qayd etgandi.
“Biz Pogbaning ‘Yunayted’ga o‘tishi borasida hech qanday taklif olganimiz yo‘q. O‘tgan jumadan boshlab bu borada hech qanday o‘zgarish bo‘lmadi”, — dedi Moratta.
Pol Pogba 2009—2012-yilgi mavsumlar davomida “Manchester Yunayted”ga tegishli bo‘lgan, biroq asosiy tarkibga tusha olmaganidan keyin “Yuventus”ga 3,5 million yevro evaziga sotib yuborilgandi.
O‘tgan mavsum Pogba “Yuventus” uchun 35 ta uchrashuvda maydonga tushdi va 8 ta gol urishga muvaffaq bo‘ldi. U Yevro—2016 turnirini kumush medallar bilan yakunladi.
Izoh (0)