iPhone “imkoniyatlar va go‘zallikni uyg‘unlashtirgani uchun” Time jurnalining dunyoni butkul o‘zgartirib yuborgan qurilmalar ro‘yxatini boshqardi. Reyting mualliflari gadjetlarning tijoriy muvaffaqiyatiga emas, insoniyat uchun ahamiyatiga e’tibor qaratgani bildirilmoqda, deya xabar beradi “Hi-Tech Mail.ru”.
Ro‘yxatning ikkinchi o‘rnini 25 yil davomida 100 milliondan ortiq miqdorda sotilgan Sony Trinitron rangli televizori egalladi. Uchinchi o‘rin yana Apple’ga, aniqrog‘i, kompaniyaning Macintosh kompyuteriga nasib etdi.
Barcha zamonlarning eng yaxshi gadjetlari o‘nligiga, shuningdek, Sony Walkman kasseta pleyeri, IBM Model 5150 kompyuteri, Victrola Record Player fonografi, Regency TR-1 radioqurilmasi, Kodak Brownie Camera fotokamerasi, Magic Wand massaj uskunasi va iPod kiritildi.
Kalkulyator, kompyuter o‘yinlari, videomagnitofon, yozuv mashinkasi, peyjer, videokamera ham mazkur reytingdan o‘rin oldi.