APL, 34-tur. “Arsenal” ochko yo‘qotib, “Manchester Siti”dan o‘zib keta olmadi

Futbol bo‘yicha Angliya Premyer-ligasining 34-turida “Arsenal” ochko yo‘qotdi. O‘z maydoni “Emireytes”da “Kristal Pelas”ni qabul qilgan Arsen Venger jamoasi 1:1 hisobida durang o‘ynadi.

Uchrashuvda hisob birinchi bo‘limning so‘nggi daqiqasida Aleksis Sanches tomonidan ochilgandi. Asosiy vaqt yakuniga 9 daqiqa qolganida Yannik Bolasye muvozanatni tiklashga muvaffaq bo‘ldi.

London derbisida qo‘lga kiritilgan 1 ochkodan keyin “Kristal Pelas” egallab turgan 16-pog‘onasidan yuqoriga ko‘tarila olmadi. Shuningdek, “Arsenal” ham “Manchester Siti”dan 3-o‘rinni qaytib ololmadi. Har ikki klub hisobida 60 tadan ochko bo‘lgani holda, “Arsenal” to‘plar nisbati bo‘yicha ortda qolmoqda.

So‘nggi to‘rt turning istalgan birida “Lester” zafar qucha olsa, “Manchester Siti” hamda “Arsenal” chempionlikdan umidini uzadi. “Lester” hisobida 34 ta o‘yindan keyin 73 ochko bor. 33 uchrashuvda 65 ochkoga ega bo‘lgan “Tottenhem” 18-aprel kuni “Stok Siti”ga qarshi maydonga tushadi.

Angliya Premyer-ligasi 34-tur bellashuvi 17-aprel, yakshanba

“Arsenal” — “Kristal Pelas” 1:1

• APL, 34-tur. “Aston Villa” 29 yildan keyin birinchi bor Premyer-liga bilan xayrlashdi

• APL, 34-tur. “Chelsi”ni yirik hisobda mag‘lub etgan “Manchester Siti” 3-o‘ringa ko‘tarildi

• APL, 34-tur. “Lester” bir kishi kam bo‘lib, mag‘lubiyatdan qutulib qoldi