Kreml G‘arb matbuotining biznesmen Bayevskiyning Putin bilan aloqalari haqidagi ayblovlariga javob berdi

Rasmiy Kreml bir qancha taniqli ayolga kvartiralar sovg‘a qilgan biznesmen Bayevskiyni bilmaydi, uning Rossiya prezidenti Vladimir Putin bilan aloqadorligi haqidagi gap-so‘zlar esa haqiqatga muvofiq kelmaydi. Bu haqda, Kremlning rasmiy vakili Dmitriy Peskovning bayonotiga asoslanib, “RIA Novosti” xabar bermoqda.

31-mart, payshanba kuni Reuters agentligi e’lon qilgan materialda rossiyalik biznesmen Grigoriy Bayevskiy bilan bog‘liq korrupsion holatlar batafsil yoritib berildi. Ta’kidlanishicha, Bayevskiy Arkadiy Rotenbergning sherigi bo‘lib, Putinga aloqador ayollarga ko‘chmas mulk — kvartira va uylar sovg‘a qilgan.

“Tanishib chiqdik. Aftidan, bu axboriy xuruj”, — dedi Peskov.

Bir necha kun oldin Peskov jurnalistlar bilan suhbat chog‘ida davlat rahbari va uning yaqinlari haqida G‘arb matbuotida buyurtma materiallar tayyorlanayotganidan ogohlantirgan edi. Navbatdagi anjumanda u Bayevskiy bilan bog‘liq xabarlar mana shu kampaniyaning bir qismi ekanini ta’kidlab o‘tdi.

“Ishonchimiz komilki, bunday chiqishlarning davomi bo‘ladi”, — deb qo‘shimcha qildi Kreml vakili.