Ispaniya chempionati 28-turida “Real” hamda “Selta” jamoalari o‘zaro bahs olib bordi. Mazkur o‘yinda madridliklar 7:1 hisobida g‘alaba qozondi. Bu haqda “Sports.ru” xabar bermoqda.
Uchrashuvning 41-daqiqasida mezbonlar himoyachisi Pepe hisobni ochdi va dastlabki bo‘lim 1:0 hisobida yakunlandi. Qolgan barcha gollarni muxlislar ikkinchi bo‘limda ko‘rdi.
“Real” hujumchisi Krishtianu Ronaldu “Selta” darvozasini ketma-ket to‘rt marotaba ishg‘ol qilishga muvaffaq bo‘ldi. Uning gollari 50, 58, 64 va 76-daqiqalarda kiritildi. 77-daqiqada Xese Rodriges, 81-daqiqada esa jarohatidan tiklanib safga qaytgan Garet Beyl gol kiritdi. “Real”ning kiritgan barcha gollariga “Selta” hujumchisi Yago Aspas bitta gol bilan javob qaytardi.
“Real” navbatdagi g‘alabadan so‘ng ochkolar sonini 60 taga yetkazib, uchinchi o‘rinda qoldi. “Selta” 42 ochko bilan hozircha oltinchi pog‘onani band qilib turibdi.
Qayd etish joiz, Krishtianu Ronaldu bugungi o‘yindan so‘ng Ispaniya chempionatida kiritgan gollari sonini 27 taga yetkazib, to‘purarlar ro‘yxatida peshqadamga aylandi. “Barselona” hujumchisi Luis Suares 25 ta gol bilan ikkinchi o‘rinda bormoqda.
Ispaniya chempionati, 28-tur
“Real Madrid” – “Selta” 7:1 (1:0)
Gollar: 1:0 – 41 Pepe, 2:0 – 50 Ronaldu, 3:0 – 58 Ronaldu, 3:1 – 62 Aspas, 4:1 – 64 Ronaldu, 5:1 – 76 Ronaldu, 6:1 – 77 Xese, 7:1 – 81 Beyl.“Real Madrid” – Navas, Ramos, Karvaxal (Marselo, 77), Danilo, Pepe, Kovachich, Kazemiro, Isko (Beyl, 65), Vaskes, Ronaldu, Mayoral (Xese, 70).
“Selta” – Blanko, Malyo, Planas, Kastro, Gomes, Vass (Bovyu, 77), Dias, Ernandes (Radoya, 35), Orelyana, Nolito, Aspas (Gvidetti, 67).
Ogohlantirishlar: Danilo (25), Pepe (29), Nolito (40), Kastro (59), Orelyana (85).
Izoh (0)