Microsoft kompaniyasi Nyu-Yorkdagi taqdimotida Surface Pro 4 gibridi, Surface Book birinchi noutbugi, shuningdek, Microsoft Band ikkinchi avlodi va HoloLens’ni ommaga namoyish etdi. Bu haqda “Hi-tech.mail.ru” xabar beradi.
Surface Pro 4 2736 x 1824 pikselli va 267 ppi zichlikdagi, 12,3 dyuymli displeyga ega. Gadjet Intel Core oltinchi avlod protsessori bilan sotuvga chiqadi. Uning tezligi oldingi avlodga qaraganda 30 foizga oshganligi ma’lum qilinmoqda. Planshet sakkiz megapikselli kameraga ega. Qurilmaning o‘zi yanada yupqaroq (8,4 millimetr) va yengilroq bo‘ldi. Uning boshlang‘ich narxi 899 dollar bo‘lib, sotuvga 26-oktabrdan chiqadi.
Surface lineykasi Surface Book noutbugi bilan to‘ldirildi. Yangi qurilma 267 ppi zichlik, 3000 x 2000 pikselli va 13,5 dyuymli displeyga ega. Uning ish jarayoni uchun eng yangi Intel protsessori javob beradi. Surface Book’ning ekrani uning klaviaturasidan yechib olinib, planshet sifatida qo‘llanilishi mumkin.
Gadjetning og‘irligi 720 gramm, qalinligi esa 7,7 millimetrdir. Klaviatura bilan birgalikda esa uning og‘irligi 1,5 kilogrammni tashkil etadi. Uni 26-oktabrdan 1499 dollardan xarid qilish mumkin.
Kompaniya, shuningdek, Microsoft Band – fitnes-trekerining ikkinchi avlodini taqdim etdi. Gadjetga organizm holati va atrof-muhitni kuzatuvchi 11 ta turli datchiklar o‘rnatilgan. Microsoft Health dasturi endi faoliyatning barcha ko‘rsatkichlari bo‘yicha yanada to‘liqroq statistik ma’lumotlarni taqdim etadi. Gadjet 30-oktabrdan 249 dollar qiymatida sotuvga chiqadi.
Microsoft HoloLens ko‘zoynaklari uchun ham taqdimotdan vaqt ajratdi. Kompaniya Project Xray nomli o‘yinni namoyish qildi. 2016-yilning birinchi choragida ishlab chiqaruvchilar HoloLens uchun dasturlarni yaratishga kirishadi.
Izoh (0)