27-fevral kuni “Turkiston” saroyida O‘zbekiston xalq shoiri Zulfiya tavalludining 100 yilligiga bag‘ishlangan tantanali adabiy-badiiy kecha bo‘lib o‘tdi, deb xabar beradi O‘zbekiston Milliy axborot agentligi.
O‘zbekiston Respublikasi Prezidentining Davlat maslahatchisi X. Sultonov, O‘zbekiston Respublikasi Bosh vazirining o‘rinbosari, Respublika Xotin-qizlar qo‘mitasi raisi E. Bositxonova, O‘zbekiston Yozuvchilar uyushmasi raisi M. Ahmedov, O‘zbekiston Yozuvchilar uyushmasining Sirdaryo viloyati bo‘limi rahbari H. Ortiqboyeva va boshqalar O‘zbekistonda ijod ahliga ko‘rsatilayotgan e’tibor va g‘amxo‘rlik adabiyot, san’at, madaniyat va ma’naviyatni, ilm-fanni tobora ravnaq toptirish, yangicha fikr va dunyoqarashga ega bo‘lgan avlodni voyaga yetkazish, ijodkorlarni yangidan-yangi marralar sari ruhlantirish imkonini berayotganini ta’kidladi.
Shoiraning “Saylanma” kitobi chop etildi. Ingliz va qoraqalpoq tillariga tarjima etilgan she’riy to‘plamlari kitobxonlar uchun o‘ziga xos tuhfa bo‘ldi. “Zulfiya zamondoshlari xotirasida” kitobida adabiyotshunoslar, olimlar, yozuvchi va shoirlar, munaqqidlarning el suygan ijodkor haqidagi yorqin xotiralari, qimmatli fikrlari keltirilgan.
Shoiraning “Xotiram siniqlari” dostoni asosida O‘zbekiston Xotin-qizlar qo‘mitasi tomonidan hamkor tashkilotlar bilan birgalikda spektakl tayyorlandi. Zulfiya ijodini yoshlar o‘rtasida keng targ‘ib etish maqsadida “Saodat” jurnali qoshida “Zulfiyaxonim maktabi” to‘garagi tashkil etilib, shoiraning ijtimoiy faoliyati haqida yoshlarga batafsil ma’lumot berilmoqda. Shoira ijodi aks ettirilgan maxsus veb-sayt ishga tushirildi.
Kechada o‘zbek kinoijodkorlari tomonidan Zulfiya hayoti va ijodiga bag‘ishlab tasvirga olingan hujjatli film namoyish etildi.
Tantanali kechada O‘zbekiston xalq shoiri Zulfiyaning kelini Rioya Olimjonova yurtimizda adabiyot, san’at va madaniyat ahliga ko‘rsatilayotgan yuksak e’tibor, so‘z san’ati ravnaqi yo‘lida fidokorona mehnat qilgan ijodkorlarning adabiy merosini o‘rganish, mazmun-mohiyatini keng targ‘ib etish, xotirasini e’zozlash yo‘lidagi betimsol ezgu sa’y-harakatlar, mehr va g‘amxo‘rlik uchun minnatdorlik bildirdi.
Kechada san’at ustalari va ijrochi yoshlarning konsert dasturi namoyish etildi.
Izoh (0)